އެމެރިކާގެ ފޯވާޑް ފޮލަރިން ބަލޮގަންއަށް ދީފައިވާ އެއް މެޗުގެ އޮޓޮމެޓިކް ސަސްޕެންޝަން ފީފާގެ ޑިސިޕްލިނަރީ ކޮމިޓީން ބާތިލުކޮށް، ބެލްޖިއަމާ ދެކޮޅަށް ކުޅޭ ގަދަ 16 ގެ މެޗުގައި އޭނާއަށް ކުޅެވޭ ގޮތް ހެދުމުން ބޮޑު މައްސަލަތަކެއް ކުރިމަތިވެއްޖެއެވެ.
ބޮސްނިއާ އެންޑް ހާޒެގޮވީނާ ބަލިކުރި މެޗުގައި ވީއޭއާރް ރިވިއުއަކަށް ފަހު ބަލޮގަންއަށް ސީދާ ރަތް ކާޑު ދެއްކިއެވެ. ފީފާ ވޯލްޑް ކަޕް ގަވާއިދުގެ ދަށުން ސީދާ ރަތް ކާޑެއް ދައްކައިފި ނަމަ އެއް މެޗުގެ ސަސްޕެންޝަނެއް އޮޓޮމެޓިކުން އަންނާނެއެވެ.
އެމެރިކާއަށް ފުރަތަމަ އެންގީ މި އަދަބު އިސްތިއުނާފު ނުކުރެވޭނެ ކަމަށެވެ. ނަމަވެސް އޭގެ ފަހުން ފީފާގެ ޑިސިޕްލިނަރީ ކޮމިޓީން ނިންމީ ފީފާ ޑިސިޕްލިނަރީ ކޯޑުގެ 27 ވަނަ މާއްދާގެ ދަށުން ސަސްޕެންޝަން ތަންފީޒުކުރުން އެއް އަހަރުގެ ޕްރޮބޭޝަނަރީ މުއްދަތަކަށް ފަސްކުރުމަށެވެ.
މި މައްސަލަ އިތުރަށް ހޫނުވީ އެމެރިކާގެ ރައީސް ޑޮނަލްޑް ޓްރަމްޕް ފީފާގެ ރައީސް ޖިއާނީ އިންފަންޓީނޯއަށް ގުޅުއްވައި މި ނިންމުން މުރާޖައާ ކުރެއްވުމަށް އެދިވަޑައިގެންނެވި ކަމަށް ރިޕޯޓުތައް ފެތުރުމުންނެވެ. ފީފާގެ އިއުލާނަށް ފަހު ޓްރަމްޕް ވަނީ ”ބޮޑު ބޭއިންސާފެއް ރަނގަޅުކޮށްދެއްވީތީ“ ފީފާއަށް ޝުކުރު އަދާކުރައްވައިފައެވެ. ނަމަވެސް ސިޔާސީ ނުފޫޒެއް ފޯރީ ކަމަކަށް ފީފާއިން ވެސް ވައިޓް ހައުސް އިން ވެސް ބުނެފައެއް ނުވެއެވެ. ފީފާއިން ބުނީ ޑިސިޕްލިނަރީ ކޮމިޓީން އަމަލުކުރީ ގަވާއިދުން ލިބިދޭ ބާރުގެ ތެރެއިން ކަމަށެވެ.
ބެލްޖިއަމުން ވަނީ މި ނިންމުމާ މެދު ވަރަށް ބޮޑަށް ނުރުހުން ފާޅުކޮށްފައެވެ. ބެލްޖިއަމްގެ ހެޑް ކޯޗު ރޫޑީ ގާސިއާ ވަނީ މި ނިންމުމަކީ ހައިރާންކުރުވަނިވި ނިންމުމެއް ކަމަށް ސިފަކޮށްފައެވެ. އަދި ބެލްޖިއަމް ފުޓުބޯޅަ ފެޑެރޭޝަނުން ވަނީ މަޖުބޫރު ސަސްޕެންޝަނެއް ބާތިލުކުރެވެނީ ކިހިނެއްތޯ ސުވާލު އުފައްދައިފައެވެ. ބެލްޖިއަމުން ގާނޫނީ ފިޔަވަޅެއް އެޅުމާ މެދު ވިސްނަމުންދާ ކަމަށާއި ފީފާގެ ކިބައިން އިތުރު ތަފްސީލު ހޯދުމަށް އެދިފައިވާ ކަމަށް ރިޕޯޓުތައް ބުނެއެވެ.
ބަލޮގަންގެ މައްސަލައާ ގުޅިގެން ފީފާގެ މިނިވަންކަމާ މެދު ބޮޑު ބަހުސެއް ފެށިފައިވެއެވެ. ފާޑުކިޔާ ފަރާތްތަކުން ބުނަނީ ފީފާގެ ފްލެގްޝިޕް މުބާރާތުގައި ހާއްސަކޮށް ސިޔާސީ ނުފޫޒުން ފީފާ މިނިވަންވާން ޖެހޭނެ ކަމަށެވެ. ނަމަވެސް މި ނިންމުމަށް ތާއީދުކުރާ ފަރާތްތަކުން ބުނަނީ ފީފާއިން ހަމައެކަނި ޑިސިޕްލިނަރީ ކޯޑުގައި އޮތް މާއްދާއެއް ބޭނުންކޮށް، މާ ހަރުކަށި އަދަބެއް ރަނގަޅުކުރީ ކަމަށެވެ.
