ދައުރުން ބޭރު ޖަލްސާއެއް އާދީއްތަ ދުވަހު ބާއްވަނީ

ދައުރުން ބޭރު ރައްޔިތުންގެ މަޖިލީހުގެ ޖަލްސާއެއް އާދީއްތަ ދުވަހު ބާއްވަން އެޖެންޑާކޮށްފިއެވެ.

މަޖިލީހުގެ އިދާރާއިން އާންމުކޮށްފައިވާ އެޖެންޑާގައިވާގޮތުން ރައީސް ޑރ. މުހައްމަދު މުއިއްޒުގެ ކެބިނެޓަށް ރުހުންދިނުމާ މެދު ވޯޓަށް އެހުން ވެސް އެ ދުވަހުގެ ޖަލްސާގައި އޮންނާނެއެވެ.

މީގެއިތުރުން ރަމަޟާން މަހުގެ ތެރޭގައި އިންތިހާބުތައް ބޭއްވުން މަނާކުރަން އިންތިހާބުތަކާ ބެހޭ އާންމު ގާނޫނަށް އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅި އިސްލާހުގެ ފުރަތަމަ ކިޔުން އިއްވުން އެޖެންޑާކޮށްފައިވެއެވެ.

އަދި ގޯއްޗާއި ފްލެޓް ދިނުން އަވަސްކުރަން ގަލޮޅު ދެކުނު ދާއިރާގެ މެމްބަރު މީކާއީލް އަހްމަދު ނަސީމް ބިމާ ބެހޭ ގާނޫނަށް ހުށަހެޅި އިސްލާހުގެ ފުރަތަމަ ކިޔުން އިއްވުން ވެސް އެ ދުވަހުގެ ޖަލްސާއަށް އެޖެންޑާކޮށްފައިވެއެވެ.

އިދިކޮޅު އެމްޑީޕީ އާއި ޑިމޮކްރެޓްސް ގުޅިގެން މިއަދު ވަނީ ދައުރުން ބޭރު ޖަލްސާތަކެއް ބާއްވަން ހުށަހަޅާފައެވެ. އެ ދެ ޕާޓީ ގުޅިގެން ކުރަން ނިންމާފައިވާ މުހިންމު ކަންތައްތަކުގެ ތެރޭގައި މަޖިލީހުގެ މެމްބަރުންގެ އަދަދު މަދުކުރުމަށް ގާނޫނު އަސާސީ އިސްލާހު ކުރުން ހިމެނެއެވެ.