ސްޓްރެސް ވެގެން ގޮސް ގަތް ލޮޓަރީ ޓިކެޓުން 50،000 ޑޮލަރު!

އެމެރިކާގެ މެރީލޭންޑް މީހަކު އޮފީހުގައި ހޭދަކުރި ސްޓްރެސް ދުވަހަކަށްފަހު ގޮސް ގަތް ލޮޓަރީ ޓިކެޓުން 50،000 ޑޮލަރު ލިބިއްޖެ އެވެ.

”ސްޓޯން ކޯލްޑް މަނީ“ގެ ނަމުގައި އެ ފައިސާއާ ހަވާލުވި މީހާ ބުނި ގޮތުގައި އޭނާއަކީ އިންފޮމޭޝަން ޓެކްނޮލޮޖީ ޕްރޮފެޝަލްއެއްގެ މަގާމުގައި ވަޒީފާ އަދާކުރާ މީހެކެވެ.

އަދި ލޮޓަރީ ޓިކެޓެއް ގަތީ އޮފީހުގައި ހޭދަކުރަންޖެހުނު ސްޓްރެސް ދުވަހަކަށްފަހު މެންދުރުގެ ކެއުން ނަގަން ދިޔަ މަގުމަތީގައި ކަމަށް އޭނާ ބުންޏެވެ.

އޭނާ ބުނި ގޮތުގައި، ފައިސާގެ އިނާމު ލިބުނުކަން އެނގުނީ ކާން އިނދެފައި ޓިކެޓް ސްކޭން ކޮށްލުމުންނެވެ. އަދި އެކަން ވަގުތުން އޭނާގެ އަންހެނުންނަށާއި މަންމައަށް އަދި ގާތް އެކުވެރިއެއް ގާތު ބުނި ކަމަށް ބުންޏެވެ.

އޭނާ ބުނީ، އޮފީހުގައި ހޭދަކުރި ސްޓްރެސް ދުވަސް ބަދަލުވެގެން ދިޔައީ އޭނާގެ ހަޔާތުގައި ދުވަހަކުވެސް ހަނދާން ނުނެތޭނެ ދުވަހަކަށް ކަމަށެވެ. އަދި ލިބުނު ފައިސާ ހަރަދުކުރާނީ އާއިލާއަށް ގެއަށް ގަތުމަށް ކަމަށް އޭނާ ބުންޏެވެ.