މާލޭ ސްކޫލްތަކުގެ ގްރޭޑް އެކަކަށް ވަންނަން 2،200 އަށްވުރެ ގިނަ ފޯމު!

މާލޭ ސްކޫލްތަކުގެ ގްރޭޑް އެކަކަށް ވަންނަން 2،290 ކުދިންގެ ފޯމު ހުށަހަޅާފައިވާ ކަމަށް އެޑިއުކޭޝަން މިނިސްޓްރީން ބުނެފި އެވެ.

ރަށްރަށުން މާލޭގެ ސްކޫލުތަކަށް ބަދަލުވާން ބޭނުންވާ ކުދިންނަށާއި މާލޭގެ ސްކޫލްތަކުގެ ގްރޭޑް އެކަކަށް އަލަށް ވަންނަން ބޭނުންވާ ކުދިން އަދި މާލޭގެ އެކި ސްކޫލްތައް ބަދަލުކުރަން ބޭނުންވާ ކުދިން ފޯމު ހުށަހެޅުމުގެ ސުންގަނޑިއަކީ އަންނަ އަންގާރަ ދުވަހެވެ.

އެޑިއުކޭޝަން މިނިސްޓްރީން އިއްޔެ އާންމުކުރި ތަފާސްހިސާބު ތަކުގައިވާ ގޮތުން ގްރޭޑް އެކެއް ފިޔަވައި އެހެން ގްރޭޑްތަކުން ޖާގަ ހޯދަން 1،450 ކުދިން އަދި މާލެ ސަރަހައްދުގެ އެއް ސްކޫލުން އަނެއް ސްކޫލަށް ވަންނަން 660 ކުދިން ވަނީ ފޯމު ހުށަހަޅައިފަ އެވެ. އަދި މާލޭގެ ސްކޫލުތަކަށް ބަދަލުވާން މިހާތަނަށް 790 ކުދިން ހުށަހަޅާފައިވާ ކަމަށްވެސް ބުންޏެވެ.

މިނިސްޓްރީން ވަނީ މި މަހުގެ ހަތަރެއްގެ ނިޔަލަށް ހުށަހަޅާފައިވާ ހުރިހާ ފޯމެއްގެ ޖަވާބު މި މަހުގެ 13 ވަނަ ދުވަހުގެ މެންދުރުފަހު 2:00 ކުރިން ފޮނުވާނެ ކަމަށެވެ.

އެޑިއުކޭޝަން މިނިސްޓްރީގެ އެކެޑމިކް ކަލަންޑަރުގައިވާ ގޮތުން، ދިރާސީ އަހަރުގެ ކިޔެވުން ފަށާނީ މި މަހުގެ 26 ގައެވެ.