މިނިސްޓަރު ސައީދު އެމެރިކާއަށް، 15 ދުވަސް ތެރޭ ރާއްޖޭން ބޭރަށް ކުރައްވާ ދެވަނަ ދަތުރު

އިކޮނޮމިކް މިނިސްޓަރު މުހައްމަދު ސައީދު ރަސްމީ ދަތުރެއްގައި އެމެރިކާއަށް ވަޑައިގެންފި އެވެ.

އިކޮނޮމިކް މިނިސްޓްރީން ބުނީ ސައީދު، އެމެރިކާއަށް ކުރައްވާ ދަތުރަކީ އެ ގައުމާއި ރާއްޖެއާ ދެމެދު ވިޔަފާރީގެ މުއާމަލާތްތައް ފުޅާކޮށް، އިންވެސްޓްމެންޓްތައް އިތުރުކުރުން މަގުފަހިކުރުމަށް ކުރައްވާ ދަތުރެއް ކަމަށެވެ. އެ ދަތުރުގައި އެމެރިކާގެ ވިޔަފާރީގެ ދާއިރާގައި ފާހަގަކޮށްލެވޭ އިސް ފަރާތްތަކާ ސައީދު ބައްދަލުކުރައްވާނެ ކަމަށްވެސް ބުންޏެވެ.

އޭގެ ތެރޭގައި ޓްރޭޑް މަންދޫބުން، އެމެރިކާގެ ޗެމްބާ އޮފް ކޮމާސްގެ މެންބަރުން އަދި އެހެނިހެން ސަރުކާރުގެ އިދާރާތަކުގެ ބޭފުޅުން ހިމެނޭ ކަމަށް މިނިސްޓްރީން ބުންޏެވެ.

ސައީދު، އެމެރިކާއަށް މިއަދު ވަޑައިގެންނެވި އިރު، މިއީ 15 ދުވަސް ތެރޭގައި އޭނާ ރާއްޖެ އިން ބޭރަށް ކުރައްވާ ދެވަނަ ދަތުރެވެ.

ސައީދު ވަނީ މިދިޔަ ޖޫން މަހުގެ 24 ވަނަ ދުވަހު ރަސްމީ ދަތުރެއްގައި ޗައިނާއަށްވެސް ވަޑައިގެންފަ އެވެ. އަދި މިދިޔަ މަހު ފަހުކޮޅު ފޮރިން މިނިސްޓަރު މޫސާ ޒަމީރުވެސް ވަނީ ރަސްމީ ދަތުރެއްގައި އެމެރިކާއަށް ވަޑައިގެންފަ އެވެ.