އެމްއެމްއޭގެ ގަވަރުނަރުގެ މަގާމަށް މުނައްވަރު އައްޔަންކުރައްވައިފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރުގެ މަގާމަށް، އަހުމަދު މުނައްވަރު މިއަދު އައްޔަން ކުރައްވައިފި އެވެ.

ރާއްޖޭގެ މަރުކަޒީ ބޭންކު، އެމްއެމްއޭގެ ގަވަރުނަރުގެ މަގާމުގައި ހުންނެވި އަލީ ހާޝިމް އެ މަގާމުން ވަކިކުރެއްވުމަށްފަހު އާ ގަވަރުނަރަކަށް މުނައްވަރު އައްޔަން ކުރެއްވުމަށްޓަކައި ރައީސް، އޭނާގެ ނަން މަޖިލީހަށް ފޮނުއްވީ މި މަހުގެ 22 ވަނަ ދުވަހު އެވެ. އަދި ރައްޔިތުންގެ މަޖިލީހުން އިއްޔެ ވަނީ ގަވަރުނަރަކަށް މުނައްވަރު އައްޔަން ކުރަން ރުހުން ދީފަ އެވެ.

ގަވަރުނަރު ކަމަށް އައްޔަން ކުރެއްވިކަމުގެ ލިޔުން، މުނައްވަރަށް ރައީސް ހަވާލުކުރެއްވީ، އެކަމަށްޓަކައި މިއަދު ހެނދުނު ރައީސް އޮފީހުގައި ބޭއްވެވި ރަސްމިއްޔާތެއްގަ އެވެ. އެ ރަސްމިއްޔާތަށްފަހު ރައީސް ވަނީ މުނައްވަރާ ބައްދަލުކުރައްވައިފަ އެވެ.

ރައީސް އޮފީހުން ބުނީ، އެ ބައްދަލުކުރެއްވުމުގައި ރާއްޖޭގެ އިގުތިސާދީ ހާލަތާ ގުޅޭ ގޮތުން ރައީސް އާއި ގަވަނަރު މަޝްވަރާ ކުރެއްވި ކަމަށެވެ. އަދި ފައިނޭންސްގެ ދާއިރާއާއި ގުޅޭ އެހެން މުވައްސަސާތަކާ ގުޅިގެން މަސައްކަތް ކުރެއްވުމަށް ރައީސް ބާރުއެޅުއްވި ކަމަށް ބުންޏެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ފިނޭންސް މިނިސްޓަރުގެ މަގާމުގައި ހުންނެވި މުނައްވަރަކީ މީގެ ކުރިން އެމްއެމްއޭގައި 10 އަހަރު ވަންދެން ހިދުމަތް ކުރެއްވި ބޭފުޅެކެވެ. އޭނާ މިހާރު ހުންނެވީ ފިނޭންސް މިނިސްޓަރުގެ އެޑްވައިޒަރުގެ މަގާމުގަ އެވެ.