އުއްމީދަކީ ”އިންޑިއާ އައުޓް“ އިން ”ވެލްކަމް އިންޑިއާ“ އަށް ގެނައި ބަދަލު ވަގުތީ ކަމަކަށް ނުވުން: އެމްޑީޕީ

ރައީސް ޑރ. މުހައްމަދު މުއިއްޒުގެ ސަރުކާރުން އިންޑިއާއާމެދު ގެންގުޅޭ ސިޔާސަތު ’އިންޑިއާ އައުޓް‘ އިން ’ވެލްކަމް އިންޑިއާ‘ އަށް ބަދަލުކުރި ކުރުމަށް އެމްޑީޕީން މަރުހަބާ ކިޔައިފި އެވެ.

އެމްޑީޕީން އިއްޔެ ނެރުނު ބަޔާނެއްގައި ބުނީ، އިންޑިއާގެ ގުޅުން އަބަދުވެސް ބިނާވެފައިވަނީ އެއް ގައުމުން އަނެއް ގައުމަށް އިހުތިރާމުކުރުމާއި ބައިނަލްއަގުވާމީ ގާނޫނުތަކަށް ހުރުމަތްތެރިކޮށް ހިތުމާއި ދެ ގައުމުގެ ސަރަހައްދުގެ ސަލާމަތްތެރިކަމާއި ސަރަހައްދީ ސަލާމަތާއި އިންޑިއާ ކަނޑުގެ ސަރަހައްދުގެ އަމާންކަމާއި ރައްކާތެރިކަމަށް ކުރެވޭ މަސައްކަތްތަކުގެ މައްޗަށް ކަމަށެވެ.

ނަމަވެސް މިއަދުގެ ސަރުކާރުން އެކި ގޮތްގޮތަށް އިންޑިއާއާ ދެކޮޅަށް ދިވެހި ރައްޔިތުންގެ މެދުގައި ނަފުރަތު އުފެއްދުމަށް މަސައްކަތް ކުރިކަމީ ހިތާމަކުރާ ކަމެއް ކަމަށް ބުންޏެވެ.

އެމްޑީޕީން ބުނީ، ސަރުކާރުން އިންޑިއާއާމެދު ގެންގުޅޭ ސިޔާސަތު ’އިންޑިއާ އައުޓް‘ އިން ’ވެލްކަމް އިންޑިއާ‘ އަށް ބަދަލުކުރި ކުރުމަކީ ހަމައެކަނި ވަގުތީ ނުވަތަ ދެއްކުންތެރިކަމުގެ ބަދަލަކަށް ނުހަދައި، ދިވެހި ރައްޔިތުންގެ މަސްލަހަތަށްޓަކައި ދެމެހެއްޓެނިވި އަދި މާނަހުރި ބަދަލަކަށް ވާނެކަމަށް އުއްމީދު ކުރާ ކަމަށެވެ.

އަދި ’އިންޑިއާ އައުޓް‘ ކެމްޕޭނުގެ ހެދި ދޮގުތަކާއި އޭގެ ސަބަބުން ލިބުނު ގެއްލުންތަކަށް، ރައްޔިތުންގެ ކިބައިން މި ސަރުކާރުން މައާފަށް އެދެން އެމްޑީޕީން ގޮވާލި އެވެ.