މާލޭގައި ދުއްވާ އެހެން ޒޯންތަކުގެ އުޅަނދުތައް ޕާކުކުރާނެ ބިމެއް ހުޅުމާލެއިން ހަމަޖައްސަނީ

މާލެ ސަހައްދުގައި ދުއްވާ އެހެން ޒޯންތަކުގެ ރަޖިސްޓަރީ އޮންނަ އުޅަނދުތައް ވަގުތީ ގޮތުން ޕާކުކުރާނެ ބިމެއް ހުޅުމާލެ އިން ހަމަޖެއްސުމަށްޓަކައި ޓްރާންސްޕޯޓް މިނިސްޓްރީން އެޗްޑީސީ އާއެކު އެއްބަސްވުމުގައި އިއްޔެ ސޮއިކޮށްފި އެވެ.

ޓްރާންސްޕޯޓް މިނިސްޓްރީން އެކްސްގައި ކުރި ޕޯސްޓެއްގައި ބުނީ، ހުޅުމާލެއިން ހަމަޖައްސާ ބިމަށް މާލެ ސަރަހައްދުގައި ރަޖިސްޓްރީ ނުކޮށް މަގުމަތީގައި ބާއްވާފައި އޮންނަ ވެހިކަލްތައްވެސް ގެންދަންޖެހޭނެ ކަމަށެވެ.

މިއީ އެ މިނިސްޓްރީން އިސްނަގައިގެން ހޯމް މިނިސްޓްރީއާއި އެޗްޑީސީ އަދި މާލޭ ސިޓީ ކައުންސިލާއި ފުލުހުން ގުޅިގެން މާލެ ސަރަހައްދުގެ މަގުތައް ތޮއްޖެހުން ކުޑަކުރުމުގެ ގޮތުން އަޅަން ނިންމާފައިވާ ފިޔަވަޅެއް ކަމަށްވެސް ބުންޏެވެ.

މިދިޔަ ހަފުތާގައި ބޭއްވި ނޫސްވެރިންގެ ބައްދަލުވުމެއްގައި ޓްރާންސްޕޯޓް މިނިސްޓަރު މުހައްމަދު އަމީން ވަނީ މާލެ ސަހައްދުގައި ދުއްވާ އެހެން ޒޯންތަކުގެ ރަޖިސްޓްރީ އޮންނަ އުޅަނދުތައް އެޗްޑީސީން ދައްކާ ބިމަކަށް އަމިއްލަ އަށް ގެންގޮސް ބާއްވައިގެން، ރަޖިސްޓަރީ ކުރަން ހަ މަސް ދުވަހުގެ މުއްދަތެއް ދޭން ނިންމާފައިވާ ކަމަށް ވިދާޅުވެފަ އެވެ.

އެ ބިމަށް އެފަދަ ވެހިކަލް ގެންދިއުމަށް 40 ދުވަހުގެ މުއްދަތެއް ލިބޭނެ އެވެ. އެއަށްފަހު މާލޭގައި ދުއްވާ އެހެން ޒޯންތަކުގެ ރަޖިސްޓަރީ އޮންނަ ވެހިކަލްތައް ޓޯ ކުރަން ފަށާނެ ކަމަށް ހޯމް މިނިސްޓްރީން ބުނެ އެވެ.