ސިންގަޕޫރު ދަތުރުފުޅަށްފަހު ރައީސްގެ ދެކަނބަލުން ރާއްޖެ ވަޑައިގެންފި

ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވައިލެއްވުމަށްފަހު ރައީސް ޑރ. މުހައްމަދު މުއިއްޒާއި އެ މަނިކުފާނުގެ އަނބިކަނބަލުން ސާޖިދާ މުހައްމަދު މިރޭ ރާއްޖެ ވަޑައިގެންފިއެވެ.

ރައީސްގެ ދެ ކަނބަލުން ނުރަސްމީ ދަތުރުފުޅެއްގައި ސިންގަޕޫރަށް ފުރާވަޑައިގެންނެވީ މިދިޔަ ހޯމަ ދުވަހުގެ ރޭގެ ވަގުތެއްގަ އެވެ. މައުލޫމާތު ލިބިފައިވާ ގޮތުގައި ރައީސްގެ ދެކަނބަލުންގެ މި ދަތުރުފުޅަކީ މެޑިކަލް ޗެކަޕެއް ހެއްދެވުމަށް ކުރެއްވި ދަތުރުފުޅެކެވެ.

މިއީ ރައީސްގެ ދެކަނބަލުން ފަސް މަސް ތެރޭގައި ސިންގަޕޫރަށް ވަޑައިގެންނެވި ތިންވަނަ ފަހަރެވެ. އެގޮތުން ރައީސްގެ ދެކަނބަލުން މި އަހަރު އެންމެ ފުރަތަމަ ސިންގަޕޫރަށް ވަޑައިގެންނެވީ މި އަހަރުގެ މާޗު މަހުގެ 22 ގައެވެ. އެއީ ތިން ދުވަހުގެ ދަތުރުފުޅެކެވެ.

އޭގެ ފަހުން މި އަހަރުގެ މެއި މަހުގެ އެއްވަނަ ދުވަހު ނުރަސްމީ ދަތުރުފުޅެއްގައި ސިންގަޕޫރަށް ވަޑައިގެންނެވި އެވެ. އެ ފަހަރު އެނބުރި ރާއްޖެ ވަޑައިގެންނެވީ ފަސް ދުވަސް ފަހުންނެވެ.