ރަސްފަރި ފަރު އާރާސްތުކޮށް އަލުން އިޔާދަކުރުމުގެ މަޝްރޫއަށް އެހީތެރިކަން ފޯރުކޮށްދިނުމަށް މާލެ ވޯޓާ އެންޑް ސެވަރޭޖް ކަމްޕެނީ (އެމްޑަބްލިއުއެސްސީ) އިން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އާއެކު އެއްބަސްވުމެއްގައި ސޮއިކޮށްފި އެވެ.
ރިސާޗް އުޅަނދު، އާރުވީ ތިމާވެށީގައި މިއަދު ބޭއްވި ރަސްމިއްޔާތެއްގައި އެއްބަސްވުމުގައި އީޕީއޭގެ ފަރާތުން ސޮއިކުރެއްވީ ޑިރެކްޓާ ޖެނެރަލް އިބްރާހިމް ނައީމެވެ. އެމްޑަބްލިޔުއެސްސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަބްދުލް މަތީން މުހައްމަދެވެ. އެ ރަސްމިއްޔާތުގައި އީޕީއޭ އަދި އެމްޑަބްލިޔުއެސްސީގެ އިސްވެރިންނާއި މެނޭޖްމަންޓް ޓީމުން ބައިވެރިވެވަޑައިގެންނެވި އެވެ.
އެމްޑަބްލިއުއެސްސީން ބުނީ އެ އެއްބަސްވުމުގެ މައިގަނޑު މަގުސަދަކީ އީޕީއޭ އިން އިސްނަގައިގެން ކުރިއަށްގެންދާ ރަސްފަރީގެ ފަރުތަކާއި މުރަކަތައް އާރާސްތުކޮށް އަލުން އިޔާދަކުރުމުގެ މަޝްރޫއަށް އެ ކުންފުނިން ފަންނީ އެހީތެރިކަން ފޯރުކޮށްދިނުން ކަމަށާއި އެގޮތުން އެ މަޝްރޫއުގައި ބޭނުންކުރަމުންދާ އާރުވީ ތިމާވެށި އުޅަނދުގައި އެމްޑަބްލިޔުއެސްސީން ފެން ޕްލާންޓެއް ބެހެއްޓުމާއި ސާވޭ ކުރުމަށް ބޭނުންވާ ސާމާނު ހޯދައިދިނުން ހިމެނޭ ކަމަށެވެ.
އޭގެ އިތުރުން އެ ކުންފުނީގެ އިޖުތިމާއީ ޒިންމާގެ ދަށުން އެ މަޝްރޫއަށް ބޭނުންވާ ފެން ފޯރުކޮށްދިނުމާއި ދަތުރުފަތުރުގެ އިންތިޒާމުތައް ހަމަޖައްސައިދިނުންވެސް ހިމެނޭ ކަމަށް ބުންޏެވެ.
މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިންމު އެއް ސަރަހައްދު ކަމަށްވާ ރަސްފަރި ފަރަކީ 1995 އިން ފެށިގެން ހިމާޔަތްކޮށްފައިވާ ފަރެކެވެ. ނަމަވެސް 2021 ވަނަ އަހަރުގެ އޮގަސްޓު މަހު ރަސްފަރި ފަރަށް ބާޖެއް އަރައި، 2،800 އަކަ މީޓަރަށްވުރެ ބޮޑު ފަރުގެ ސަރަހައްދެއް ވަނީ ހަލާކުވެފަ އެވެ.
އެމްޑަބްލިޔުއެސްސީން ބުނީ އެ އެއްބަސްވުމަކީ ރާއްޖޭގެ ކަނޑުގެ ވެށި ރައްކާތެރިކުރުމަށް ސަރުކާރުން ކުރަމުންދާ މަސައްކަތަށް އެއްބާރުލުން ދިނުމުގެ ގޮތުން އެ ކުންފުނިން އެޅި މުހިންމު ފިޔަވަޅެއް ކަމަށެވެ. އަދި އެމްޑަބްލިޔުއެސްސީ އަކީ ތިމާވެށި ހިމާޔަތްކޮށް އަދި ރައްކާތެރިކުރުމަށް ކުރިއަށްގެންދެވޭ މިފަދަ ހަރަކާތްތަކަށް އަބަދުވެސް އެއްބާރުލުންދޭ ކުންފުންޏެއް ކަމަށްވެސް ބުންޏެވެ.

1 Comment
ގުޅުންހުރި
އެމްޑަބްލިޔުއެސްސީ: ރައްޔިތުންގެ ހިދުމަތުގައި 30 އަހަރު، ފަހުރުވެރި ކާމިޔާބު ކުންފުންޏެއް
އީދު ކުލަގަދަކޮށް ފާހަގަކުރުމުގެ އިންތިޒާމުތައް ހަމަޖެއްސި ފަރާތްތަކަށް ރައީސްގެ ޝުކުރު
ރޯދަމަހު ލޭ ލިބުމުގައި ދިމާވާ ދަތިކަމަށް އެހީވުމަށް އެމްޑަބްލިޔުއެސްސީގެ މުވައްޒަފުން ލޭ
މާލެ-ހުޅުމާލޭގެ ފެނުގެ ވިއުގަ ގުޅާލުމުގެ މަޝްރޫއުގެ 65 ޕަސެންޓް ނިމިއްޖެ
އެމްޑަބްލިޔުއެސްސީން ދޭ އެންމެ ހާއްސަ އެވޯޑް އެ ކުންފުނީގެ އެސިސްޓަންޓް ޖީއެމް
އެމްޑަބްލިޔުއެސްސީ އިން ތަކަންދޫގެ ފެނާއި ނަރުދަމާ ނިޒާމު ގާއިމުކުރުމުގެ މަސައްކަތް ނިންމާލައިފި