އެސްޓީއޯގެ ދަށަށް ފެނަކަ ބަދަލުކުރުމަށް ކުރަމުންދާ މަސައްކަތް ހުއްޓާލައިފި

ސަރުކާރުގެ މައި ވިޔަފާރި ކުންފުނި، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ދަށަށް ފެނަކަ ކޯޕަރޭޝަން ބަދަލުކުރުމަށް ކުރަމުންދާ މަސައްކަތް ހުއްޓާލަން އެސްޓީއޯ އިން ނިންމައިފި އެވެ.

އެސްޓީއޯ އިން މިއަދު ނެރުނު އިއުލާނެއްގައި ބުނީ، އެ މަސައްކަތް ހުއްޓާލީ މިދިޔަ އާދީއްތަ ދުވަހު ފިނޭންސް މިނިސްޓްރީން އެގޮތަށް އަންގާފައިވާތީ އާއި އެ ކުންފުނިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމަނާފައިވާ ކަންކަން ކުރިއަށްގޮސްފައިވާ މިންވަރަށް ބެލުމަށްފަހު އެ މަސައްކަތް ހުއްޓާލަން އެ ކުންފުނީގެ ޑިރެކްޓަރުންގެ ބޯޑުން މިއަދު ނިންމާފައިވާތީ ކަމަށެވެ.

ފެނަކައިގެ ސައްތައިން ސައްތަ ހިއްސާ، އެސްޓީއޯ އިން ގަނެ، އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސެވުމަށް ނިންމެވީ ރައީސް ޑރ. މުހައްމަދު މުއިއްޒެވެ. ރައީސް އޭރު ނިންމަވާފައި އޮތީ މި އަހަރުގެ ނިޔަލަށް އެސްޓީއޯގެ ދަށަށް ފެނަކަ ބަދަލުކުރުމަށެވެ.

ނަމަވެސް އަންނަ އަހަރަށް ފާސްކުރި ދައުލަތުގެ ބަޖެޓުގައި ފިނޭންސް މިނިސްޓްރީން ބުނީ، ފެނަކައިގެ ހާލަތު ރަނގަޅު ކުރެވޭނެ އެހެން ގޮތްތަކެއް ހޯދުމަށް މަސައްކަތް ކުރާނެ ކަމަށެވެ. އެގޮތުން މިސާލަކަށް ސިނާޖީ ހާސިލުކުރެވޭ ގޮތަށް ސްޓެލްކޯއާ ފެނަކަ އެއްކޮށްލުން ފަދަ މަސައްކަތްތަކެއް ކުރުމަށް ދިރާސާކޮށް ކުރިއަށް އޮތް އަހަރު ދާއިމީ ހައްލެއް ގެނައުމަށް މަސައްކަތް ކުރާނެ ކަމަށް ބުންޏެވެ.