މީޑިއާތަކަށް 27 މިލިއަން ރުފިޔާ ދޭނެ، ކުރިއަށްދަނީ އުސޫލު ހެދުމުގެ ފަހު މަރުހަލާ: އަސްވާޑް

މީޑިއާތަކަށް ފައިސާ ދިނުމުގެ ގޮތުން ހަދަމުންދާ އުސޫލުގެ ކަންކަން މިހާރު އޮތީ އެންމެ ފަހުގެ މަރުހަލާގައި ކަމަށް ޔޫތު މިނިސްޓަރު އިބްރާހިމް ވަހީދު (އަސްވާޑް) ވިދާޅުވެއްޖެ އެވެ.

ރައްޔިތުންގެ މަޖިލީހުން އަންނަ އަހަރަށް ފާސްކޮށްފައިވާ ދައުލަތުގެ ބަޖެޓުގައި ދައުލަތުގެ އާމްދަނީން މީޑިއާތަކަށް 0.1 ޕަސެންޓު ކަނޑައަޅަން ވަނީ ހިމަނައިފަ އެވެ.

އޮންލައިން ނޫހަކަށް މައުލޫމާތު ދެއްވަމުން އަސްވާޑު މިއަދު ވިދާޅުވީ އަންނަ އަހަރު މީޑިއާތަކަށް ދިނުމަށް ބަޖެޓުގައި ކަނޑައެޅީ 27.9 މިލިއަން ރުފިޔާ އެވެ.

އޭނާ ވިދާޅުވީ މީޑިއާތަކަށް ބަޖެޓުން ފައިސާ ދިނުމުގެ އުސޫލު އެކުލަވައިލުމުގެ މަސައްކަތް ޔޫތު މިނިސްޓްރީން ފަށައިފައިވާ ކަމަށެވެ. އެ އުސޫލާ ގުޅޭ ގޮތުން ފިނޭންސް މިނިސްޓްރީ އާއި ކަމާބެހޭ އިދާރާތަކާ މަޝްވަރާ ކުރަމުން އަންނަ ކަމަށެވެ.

މީޑިއާތައް މާލީ ގޮތުން ބާރުވެރި ކުރުވުމަށް ދައުލަތުގެ ބަޖެޓުން ވަކި އަދަދެއް ކަނޑައެޅުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުގެ ތެރޭގައި ހިމެނޭ ކަމެކެވެ.