ހަމަޖެހުން ނަގާލަން ފުރުސަތެއް ނުދޭނަން، އެކަން ހުއްޓުވާނީ ގައުމީ ވިސްނުމެއްގައި: ރައީސް

ހުވަދުއަތޮޅަށް ރައީސް ކުރައްވަމުންގެންދަވާ ދަތުރުފުޅުގެ ތެރެއިން ގއ. މާމެންދުއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ އެ މަނިކުފާނުގެ ސިޔާސަތަކީ ތަރައްގީ ގާއިމުވެގެންދާއިރުގައި ގައުމުގައި ހަމަޖެހުންވެސް ގާއިމުވެފައި އޮތުން ކަމަށާއި މިދިޔަ 14 މަސް ދުވަހުގެ ތެރޭގައި ގައުމުގައި ހަމަޖެހުން ގާއިމުކޮށްފައިވާނެ ކަމަށެވެ.

”އަޅުގަނޑުމެންނެއް ނުހިންގާނަން ބަދަލު ހިފާކަށް އެއްވެސް ކަމެއް. ސިޔާސީ ވާދަވެރިކަމުގެ ތެރެއިން އެއް ބަޔަކަށް އަނިޔާކޮށް ސިޔާސީ ވިސްނުމުގެ ތެރެއިން ހައްޔަރުކޮށް، ޖަލަށް ލައި، އުނދަގޫކޮށް ހެދުމަކީ ގަބޫލުކުރާ ކަމެއް ނޫން، އަޅުގަނޑު ވައުދުވިން އެކަން އެގޮތަށް ނުހިންގާނެ ކަމަށް. މި ގައުމުގައި އަޅުގަނޑެއް ސިޔާސީ ގޮތުން އެއްވެސް މީހަކަށް އަނިޔާއެއް ނުކުރާނަން. ބަދަލު ހިފުމެއް ނޯންނާނެ. ހަމަޖެހުން ހަގީގީ މާނައިގައި އޮންނަން ބޭނުންވާތީ،“ ރައީސް ވިދާޅުވި އެވެ.

ރައީސް ވިދާޅުވީ ކުރިއަށް އޮތް ދުވަސްތަކުގައިވެސް ތަރައްގީ ގެނެސްދޭ ކަމަށްވާ ނަމަ، ތަރައްގީގެ ފުރިހަމަ ނަފާ ރައްޔިތުންނަށް ލިބޭނީ ގައުމުގައި ހަމަޖެހުން އޮވެގެން ކަމަށެވެ. އެހެންވެ ރައީސް ވަނީ އެ ހަމަޖެހުމުގައި ގައުމު ކުރިއަށް ގެންދިއުމުގައި ފުރިހަމަ އެއްބާރުލުން ދެއްވުމަށް ރައްޔިތުންގެ ކިބައިން އެދިވަޑައިގެންފަ އެވެ.

”މި ގައުމުގައި ސިޔާސީ ފަރާތްތަކުން، އަދި އެ ނޫންވެސް ބަޔަކަށް މި ހަމަޖެހުން ނަގާލުމަކަށް އަޅުގަނޑެއް ޖާގައެއް ނުދޭނަން. އެއްވެސް ފުރުސަތެއް ނުދޭނަން. އެކަމަށް އެއްވެސް ބަޔަކަށް، އެއްވެސް ކަމެއް ކުރަން މަސައްކަތްކޮށްފި ނަމަ އަޅުގަނޑު އެކަން ގައުމީ ވިސްނުމެއްގައި ހުއްޓުވައި، ގައުމުގެ ހަމަޖެހުން ޔަގީންކުރާނަން. އެ ވާހަކަ ވަރަށް ސާބިތުކަމާއެކީ މި ދަންނަވާލަނީ“ ރައީސް ވިދާޅުވި އެވެ.