ޓިކްޓޮކް ބްލޮކް ކުރަން އުޅޭ ވާހަކަ ސަރުކާރުން ދޮގުކޮށްފި

ރާއްޖޭގައި ޓިކްޓޮކް ބްލޮކްކުރަން އުޅޭ ކަމަށް ދެކެވޭ ވާހަކަތައް ސަރުކާރުން މިއަދު ދޮގުކޮށްފި އެވެ.

ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ އެއްވެސް ސޯޝަލް މީޑިއާ ޕްލެޓްފޯމެއް ބްލޮކް ކުރަން ސަރުކާރުން ނުވިސްނާ ކަމަށާއި އެފަދަ މަޝްވަރާތަކެއް ވެސް ކޮށްފައިނުވާ ކަމަށެވެ.

”ބައެއް ސޯޝަލް މީޑިއާ ޕްލެޓްފޯމްތައް ބްލޮކް ކުރަން އުޅޭ ކަމަށް ދެކެވޭ ވާހަކަތަކަކީ ކަނޑައެޅިގެން ދޮގެއް. ސޯޝަލް މީޑިއާ އެއްވެސް ޕްލެޓްފޯމެއް ބްލޮކް ކުރަން ސަރުކާރަކުން ނުނިންމާ އަދި އެފަދަ މަޝްވަރާއެއް ވެސް ނުކުރޭ،“ ހީނާ ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ ވިސްނުންފުޅަކީ ގާނޫނުއަސާސީއިން ރައްޔިތުންނަށް ލިބިދޭ އަސާސީ ހައްގުތައް ރައްކާތެރިކޮށް ކުރިއެރުވުން ކަމަށް ހީނާ ވިދާޅުވި އެވެ.

މި ސަރުކާރުން ވެރިކަމަށް އައިތާ ކުރީކޮޅު ވަނީ ދެ ވެބްސައިޓެއް ބްލޮކް ކޮށްފަ އެވެ. ސަރުކާރުން ވަނީ އެކަން ފުރަތަމަ ދޮގުކޮށްފަ އެވެ.

ފަހުން ބުނެފައި ވަނީ އެ ވެބްސައިޓު ބްލޮކް ކުރީ ރަޖިސްޓްރީނުކޮށް ނޫހެއް ގޮތަށް ހިންގާތީ ކަމަށެވެ.