މޫސުން އިތުރަށް ގޯސްވެ، އޮރެންޖު އެލާޓް ނެރެފި! ގުގުރައި ބޯކޮށް ވާރޭވެހޭނެ!

މިހާރު ކުރަމުންދާ ވިއްސާރައިގައި ބ. އަތޮޅުން ފެށިގެން ދ. އަތޮޅާ ދެމެދުގެ ސަރަހައްދުތަކަށް މޫސުމާ ބެހޭ ގައުމީ އިދާރާ (މެޓް) އިން އޮރެންޖު އެލާޓް ނެރެފި އެވެ.

މެޓުން އޮރެންޖު މިރޭ 12 ޖެހުމާ ހަމައަށް ނެރެފައިވާ އެލާޓުގައި ބުނެފައިވަނީ، އެ ސަރަހައްދުތަކަށް ގުގުރުމާ އެކު ވަރަށް ބޯކޮށް ވާރޭވެހި، ފެން ބޮޑުވާނެ ކަމަށެވެ.

މިދިޔަ ދެ ދުވަހުވެސް މާލެ ވެސް ބޯކޮށް ވާރޭވެހެމުންދާއިރު، މިއަދު ވެސް ގިނަ އިރުތަކެއް ވަންދެން މެދުނުކެނޑި ބޯކޮށް ވާރޭވެހުމުގެ ސަބަބުން މަގުތަކުގައި ވަނީ ފެންބޮޑުވެފަ އެވެ.

ފެންބޮޑުވުމާ ގުޅިގެން އެމްއެންޑީއެފުން ދަނީ މާލޭގެ ތިން ސަރަހައްދެއްގައި ފެން ހިންދުމުގެ މަސައްކަތް ކުރަމުންނެވެ. އޭގެ އިތުރުން ވެލިބަސްތާ ޖެހުމާއި ފެންބޮޑުވުމާ ގުޅިގެން ދިމާވާ އެހެނިހެން ކަންކަމުގައި އެހީތެރިކަން ފޯރުކޮށްދިނުމުގައި ވެސް އެމްއެންޑީއެފުން ދަނީ ހަރަކާތްތެރިވަމުންނެވެ.