އިއްޔެ ކަރަންޓު ބޭނުންކުރި މިންވަރު 100 މެގަވޮޓަށްވުރެ މައްޗަށް!

މާލެއާއި ހުޅުމާލޭގައި އިއްޔެ 100 މެގަވޮޓަށްވުރެ ގިނައިން ކަރަންޓު ބޭނުންކޮށްފައިވާ ކަމަށް ސްޓެލްކޯ އިން ބުނެފި އެވެ.

މި އަހަރުގެ ރޯދަ މަސް ފެށުނީއްސުރެ ސްޓެލްކޯ އިން އަންނަނީ ކޮންމެ ދުވަހަކުވެސް ގްރާފެއް މެދުވެރިކޮށް އެ ދުވަހަކު ކަރަންޓު ބޭނުންކުރި މިންވަރާއި އެންމެ ގިނައިން ކަރަންޓު ބޭނުންކުރި ވަގުތު އެނގޭނެހެން ކިޔައިދެމުންނެވެ.

ސްޓެލްކޯ އިން މިއަދު ބުނީ، މާލެ އާއި ހުޅުމާލޭގައި އިއްޔެ 100 މެގަވޮޓަށްވުރެ ގިނައިން ކަރަންޓު ބޭނުންކޮށްފައިވާއިރު، މިއީ މި ރޯދަމަހު އެވަރަށް ކަރަންޓު ބޭނުންކުރި ފުރަތަމަ ފަހަރު ކަމަށެވެ. އެހެންކަމުން ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް އެ ކުންފުނިން އެދިފައިވެ އެވެ.

ސްޓެލްކޯ އިން ހާމަކޮށްފައިވާ މައުލޫމާތަށް ބަލާއިރު، އިއްޔެ ހެނދުނު 7 އިން ފެށިގެން ކަރަންޓު ބޭނުންކުރަމުން އައި މިންވަރު ދިޔައީ އިތުރުވަމުންނެވެ. އެގޮތަށް ގޮސް އެންމެ ގިނައިން ކަރަންޓު ބޭނުންކޮށްފައިވަނީ ހަވީރު 5 ޖެހި އިރެވެ.