ކަރަންޓު މައްސަލަ ހައްލު ނުކޮށް އައްޑޫގައި އީދު ބޮކި ދިއްލުމާ ދެކޮޅު

އައްޑޫ ސިޓީއަށް ދިމާވެފައިވާ ކަރަންޓު މައްސަލަ ހައްލު ނުކޮށް އައްޑޫގައި އީދު ބޮކި ދިއްލުމާ ދެކޮޅަށް އެ ސިޓީގެ ބައެއް މީހުން ވާހަކަ ދައްކަން ފަށައިފި އެވެ.

ރާއްޖޭގެ ހުރިހާ ރަށެއް، އައްޑޫ ސިޓީ ވެސް ހިމެނޭ ގޮތަށް ކަރަންޓު މައްސަލަ ރޯދައިގެ ކުރިން ހައްލު ކުރާނެ ކަމާއި އެކަމާމެދު ރައްޔިތުން ކަންބޮޑުނުވުމަށް ރައީސް ޑރ. މުހައްމަދު މުއިއްޒު މި އަހަރުގެ ޖެނުއަރީ މަހު ވިދާޅުވި ނަމަވެސް، މި ރޯދަ މަހު އައްޑޫގައި ކަރަންޓު ކެނޑޭވަރު ގިނަވެ، ރައްޔިތުންނަށް އުނދަކުލަކަށް ވަނީ ވެފަ އެވެ.

ކަރަންޓުގެ މައްސަލަ އެއްކޮށް ހައްލުވެފައިނުވަނީސް ލޯކަލް ގަވަރުނެސް މިނިސްޓްރީން މިހާރު ދަނީ އީދަށް ކުލަބޮކިތައް ދިއްލުމުގެ ތައްޔާރީތައް ވަމުންނެވެ. އެ ތައްޔާރީތަކުގެ ތެރެއިން އެ މިނިސްޓްރީން ދަނީ އައްޑޫގައި ވެސް އީދު ބޮކިތައް ދިއްލުމުގެ މަސައްކަތް ކުރަމުންނެވެ.

ނަމަވެސް އައްޑޫ ކަރަންޓުގެ މައްސަލަ ހައްލުކޮށް ގެތައް ދިއްލުމަށް ފަހު ނޫނީ އީދު ލައިޓު ހަރުކުރުމަކީ ރައްޔިތުން ބޭނުންވާ ގޮތް ނޫން ކަމަށް ޑެޕިޔުޓީ މޭޔަރު މުހައްމަދު ޝުއާއު ފޭސްބުކްގައި ކުރެއްވި ޕޯސްޓެއްގައި ވަނީ ވިދާޅުވެފަ އެވެ.

އޭނާ ވިދާޅުވީ ފާއިތުވި އަހަރެއްހާ ދުވަހު ކަރަންޓުގެ މައްސަލައަށް ހައްލެއް ނުލިބި ދިއުމަކީ ރައްޔިތުންގެ ކަންބޮޑުވުން ހުރި ކަމެއް ކަމަށެވެ.

އައްޑޫގެ ގިނަބަޔަކު ވަނީ ޝުއާއުގެ އެ ވާހަކަތަކައް ތާއީދުކޮށް ސޯޝަލް މީޑިއާގައި ޕޯސްޓުކޮށްފަ އެވެ.

އައްޑޫ ސިޓީ ކައުންސިލްގައި ހިތަދޫ ކޮރޮވައު ތަމްސީލު ކުރައްވާ އިބްރާހިމް ޝިނާޒު ’އެކްސް’ގައި ކުރެއްވި ޕޯސްޓެއްގައި ވިދާޅުވީ އައްޑުއަށް ދިމާވެފައިވާ ކަރަންޓުގެ މައްސަލައަށް ހައްލެއް ނުލިބެނީސް އައްޑޫގެ މަގުތަކުގައި ލައިޓު ހަރުކޮށް އީދަށް ދިއްލުމާ ދެކޮޅު ކަމަށެވެ.

ގާތްގަނޑަކަށް 25،000 މީހުން އުޅޭ އައްޑޫގެ ރަށްތަކަށް ދެމެހެއްޓެނިވި ގޮތެއްގައި ކަރަންޓުގެ ހިދުމަތް ފޯރުކޮށް ނުދެވޭއިރު، އެތައް މިލިއަން ރުފިޔާއެއް ހަރަދުކޮށްގެން އީދަށް ލައިޓު ޖަހާ ދިއްލުމަކީ ގަބޫލު ކުރެވޭ ކަމެއް ނޫން ކަމަށް ވެސް ސޯޝަލް މީޑިއާގައި ހިޔާލު ފާޅުކުރި މީހަކު ބުނެފައިވެ އެވެ.