ސިނގިރޭޓު އެތެރެކޮށް ވިއްކާ ފަރާތްތަކުން އެ ވިޔަފާރި ހުއްޓާލުމަށް ރައީސް ޑރ. މުހައްމަދު މުއިއްޒު މިއަދު ގޮވާލައްވައިފި އެވެ.
ރައްޔިތުންނާ ވީހާވެސް ގާތުން މުއާމަލާތްކޮށް، މައުލޫމާތު ހިއްސާކުރުމަށްޓަކައި ރައީސް ފެއްޓެވި ޕޮޑްކާސްޓުގެ ދެވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވީ ސަރުކާރުން ސިނގިރޭޓު އަގުބޮޑު ކުރީ ސިނގިރޭޓާ ދުރުކުރުމަށް ކަމަށެވެ. އެކަމުގެ ސަބަބުން އުދަނގޫވާނެކަންވެސް އެނގިވަޑައިގަންނަވާ ކަމަށްވެސް ރައީސް ވިދާޅުވި އެވެ.
”ސިނގިރޭޓު ބުއިން ފަދަ ކަމަކުން ދުރުކުރާކަށް ފަހަރަކު ފަހަރަކު ތަންކޮޅެއް މަނާކޮށްގެން ނުވާނެ. އޭރުން ސިނގިރޭޓު އެތެރެކުރާ މީހުންނަށް އެ ލިބެނީ ފުރުސަތެއް އެ މީހުން އެތަންކޮޅު އެޖަސްޓުކޮށްގެން ވިއްކަމުންދާން. އަޅުގަނޑު އެދެން ސިނގިރޭޓު އެތެރެކޮށް ސިނގިރޭޓު ވިޔަފާރި ކުރާ މީހުން އެ ވިޔަފާރި ދޫކޮށްލަން. އެހެން ކަމަކައިގެން އުޅެން. މިއީ ކުރާވަރުގެ ކަމެއް ނޫނޭ. މިއީ ކުޑަކުޑަ ގައުމެއް. މިއީ މިލިއަނުން މިލިއަނުން މީހުން އުޅޭ ތަނެއް ނޫން. ކީއްކުރަން މިތަނުގައި އެކަން ކުރަންވީ،“ ރައީސް ވިދާޅުވި އެވެ.
އެ މަނިކުފާނު ވިދާޅުވީ ގައުމުގެ ޅަދަރިން ސިނގިރޭޓުގެ ނުރަނގަޅު އާދައިގެ ތެރެއަށް ދިއުމަށް ދޫކޮށްލައިގެން ސަރުކާރުން އޮތުމުގެ ބޭނުމެއް ވިސްނިވަޑައި ނުގަންނަވާ ކަމަށެވެ.
އެކަމުގައި ސަރުކާރުގެ ޒިންމާއެއްވެސް އެބަ އޮތް ކަމަށާއި ނޫން ނަމަ އެހެން ގައުމުތަކެކޭ އެއްގޮތަށް ރާއްޖޭގައިވެސް ޒުވާނުން ސިނގިރޭޓުގެ ތެރެއަށް ގޮސް ސަލާމަތް ނުވާ ހިސާބަށް ގޮސްދާނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ، ޒުވާނުން ދުންފަތުން ސަލާމަތް ކުރުމަށް އެޅިދާނެ ފިޔަވަޅެއް ނިންމުމުގެ ކުރިން ކަމާބެހޭ ފަރާތްތަކުގެ މަޝްވަރާ ހޯދައިގެން، ދިރާސާއެއް ހަދައި، ޕޭޕަރެއް ތައްޔާރުކުރުމަށް ހެލްތް މިނިސްޓަރާ ހަވާލުކޮށްފައިވާ ކަމަށެވެ. އެގޮތުން ކެބިނެޓަށް ހުށަހަޅަން ދެތިން ވިސްނުންފުޅެއްވެސް އެބަ އޮތް ކަމަށް އެ މަނިކުފާނު ވިދާޅުވި އެވެ.
”އެއްގޮތަކީ 1 ޖަނަވަރީ 2007 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިން، އެ ކުދިން އުމުރުގައި ކުރިއަށް އޮތްތަނުގައިވެސް ސިނގިރޭޓާއި ދުންފަތުގެ އިސްތިއުމާލު ނުކުރެވޭ ގޮތް ހެދުން. ދެވަނަ ގޮތަކީ 1 ޖަނަވަރީ 2004 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓު މަނާކުރުން.. އެއަށްވުރެ އުމުރު މައްޗަށްދާ ނަމަ 1 ޖަނަވަރީ 2000 ފެށިގެން، އޭރުން 25 އަހަރު. ކޮންމެ ގޮތެއް ވިޔަސް އުމުރުން 18 އަހަރާއި 25 އަހަރާ ދެމެދުގެ ޒުވާނުން އެކަމުގެ ތެރެޭގައި އުޅޭތާ އެހާ ގިނަ ދުވަހެއް ނުވާނެ. އެހެންވީމަ އެ ކުދިން އެ ވަބާއިން ސަލާމަތް ކުރަން ފަސޭހަވާނެ، 30، 40 އަހަރު ވެފައިވާ މީހުންނަށް ސިނގިރޭޓު ބޭނުން ކުރުމަށްވުރެ،“ ރައީސް ވިދާޅުވި އެވެ

31 Comments
ގުޅުންހުރި
ޔޫކޭ ދަތުރުފުޅަށްފަހު ރައީސް ރާއްޖެއަށް، މަޖިލިސް ރައީސް އުޒްބަކިސްތާނަށް
ރައީސްގެ ޔޫކޭ ދަތުރުފުޅު: ލިވަޕޫލްގެ ފުޓްބޯޅަ އެކެޑަމީއެއް ރާއްޖޭގައި ހަދަން މަޝްވަރާ
އޯޓިޒަމް ހުންނަ ކޮންމެ ކުއްޖަކީ މޮޅު ކުއްޖެއް، އެ ކުދީންނަށް ލޯބިދިނުމަކީ
ލިވަޕޫލް އާއެކު ހިންގާ ކެމްޕެއިން ރަސްމީކޮށް އިއުލާން ކުރުމަށް ރައީސް ޔޫކޭއަށް
ރާއްޖޭގެ މިނިވަންކަން ގާއިމުކުރަން ހިންގާ މަޝްރޫއުތަކުގެ އަގު 100 މިލިއަން ޑޮލަރަށް
އީދު ކުލަގަދަކޮށް ފާހަގަކުރުމުގެ އިންތިޒާމުތައް ހަމަޖެއްސި ފަރާތްތަކަށް ރައީސްގެ ޝުކުރު