ރާއްޖެއަށް މި ވަގުތު އެންމެ ރަނގަޅު ގޮތަކީ އެމްޑީޕީ އާއި ދަ ޑިމޮކްރެޓްސް ގުޅުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މި ސަރުކާރަށް ވަރަށް ބޮޑަށް ތާއީދުކޮށް ވާހަކަފުޅު ދައްކަވަމުން ގެންދަވާ ނަޝީދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ، އެމްޑީޕީ އާއި ޑިމޮކްރެޓްސް ގުޅުމަކީ ރާއްޖެއަށާއި ދެ ޕާޓީއަށްވެސް އެންމެ ރަނގަޅު ގޮތް ކަމަށެވެ.
ނަޝީދަކީ އެމްޑީޕީގެ އެއް ބާނީ އެވެ. އަދި ޑިމޮކްރެޓްސް އުފެއްދުމުގައި އިސްކޮށް ހުންނެވީވެސް އެ މަނިކުފާނެވެ.
އެމްޑީޕީ އާއި ޑިމޮކްރެޓްސް ގުޅުމަށް ނަޝީދު ވިދާޅުވި އިރު ޑިމޮކްރެޓްސްގައި ތިއްބެވި އެ މަނިކުފާނުގެ އެންމެ އަރިސް ބޭފުޅުން އެ ޕާޓީ ދޫކުރައްވައި އަލުން އެމްޑީޕީއާ ވަނީ ގުޅިވަޑައިގެންފަ އެވެ.
އެކަމާ ގުޅިގެން ނަޝީދު އޭރު ކުރެއްވި ޕޯސްޓެއްގައި ވަނީ، އެމްޑީޕީއަކީ އެ މަނިކުފާނުގެ ދަރިއެއް ފަދަ ޕާޓީއެއް ކަމަށާއި އެ ޕާޓީ ވަރުގަދަވެ، އޮތުން އެއީ އަބަދުވެސް އެދޭނެ ކަމެއް ކަމަށް ވިދާޅުވެފަ އެވެ.
އެމްޑީޕީ އާއި ޑިމޮކްރެޓްސް ގުޅުމަށް ނަޝީދު އެދިވަޑައިގެންނެވި އިރު، އެ މަނިކުފާނު އެނބުރި އެމްޑީޕީއަށް އަންނަން އުޅޭ ވާހަކަތަކަކާއި އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވާދަކުރައްވާނެ ކަމުގެ ވާހަކަތަކެއް ދަނީ ދައުރުވަމުންނެވެ.
ނަޝީދަކީ އެމްޑީޕީ އުފައްދަން 2003 ވަނަ އަހަރު ސަރުކާރަށް ޕެޓިޝަން ކުރެއްވި ބޭފުޅުންގެ ތެރެއިން އެކަކެވެ. ނަޝީދަކީ އެ އެމްޑީޕީގެ ފުރަތަމަ ރިޔާސީ ކެންޑިޑޭޓް އަދި އެ ޕާޓީގެ ޓިކެޓެއްގައި ރައީސުލްޖުމްހޫރިއްޔާގެ މަގާމަށް ވަޑައިގެންނެވި ފުރަތަމަ ބޭފުޅާ އެވެ.
ނަމަވެސް އެމްޑީޕީގެ ރިޔާސީ ޕްރައިމަރީގައި، އެ މަނިކުފާނުގެ ޒަމާންވީ އެކުވެރިޔާ އިބޫއާ ވާދަކުރައްވައި ނާކާމިޔާބީއާ ކުރިމަތިވެވަޑައިގެންނެވި ފަހުން ’ފިކުރެއްގެ ދިރުން‘ ނަމުގައި އެމްޑީޕީގެ ތެރެއިން ވަކި ފެކްޝަނެއް އުފައްދަވައިގެން ނަޝީދު މަސައްކަތް ކުރެއްވި އެވެ.
އަދި 18 އަހަރަށްފަހު 21 ޖޫން 2023 ގައި ނަޝީދު ވަނީ އެމްޑީޕީން ވަކިވެވަޑައިގެންފަ އެވެ. އޭރު އެ މަނިކުފާނު ހުންނެވީ އެ ޕާޓީގެ ރައީސްގެ މަގާމުގަ އެވެ.
އެމްޑީޕީން ވަކިވެވަޑައިގަތުމަށްފަހު ނަޝީދު ދެން ގުޅިވަޑައިގަތީ އެ މަނިކުފާނު އިސްވެ ހުންނަވައިގެން އުފެއްދެވި ދަ ޑިމޮކްރެޓްސް އާއެވެ. އޭގެ ކުރިން ނަޝީދު ވަނީ އެމްޑީޕީ ’އަތުލަން‘ ބޭނުންފުޅުވާ ކަމަށް ވިދާޅުވެފަ އެވެ. އަދި ޑިމޮކްރެޓްސްގެ ޖަލްސާއެއްގައި ނަޝީދު ވަނީ އެމްޑީޕީ ރޫޅާލައްވާނެ ކަމަށް ތަކުރާރުކޮށް ވިދާޅުވެފަ އެވެ.
16 Comments
ގުޅުންހުރި
އެހީގެ ޓީމު ޝަހީދުކޮށްފައި ހެދި ދޮގު ފަޅާއެރުމުން އިޒްރޭލުން ބުނީ އެއީ
ވަރުގަދަ ސީކޭއަށް ޓީއެފްޓީ އަތްދަށުން ސަލާމަތެއް ނުވެވުނު، ޒެޕޯ ބަލިކޮށް ލޮރެންޒޯ
ޝަރީއަތް ނިމެންދެން ޝަމްއާން ބަންދުކޮށްފި
ފިޝަރީޒްގެ ޑެޕިއުޓީ މިނިސްޓަރު ޝާފިއު އިސްތިއުފާ ދެއްވައިފި
ސިހުރު ހަދާކަމަށް ތުހުމަތުކުރެވޭ މައްސަލައެއްގައި ހޯރަފުށިން މީހަކު ހައްޔަރުކޮށްފި
އެޗްޑީސީގެ ބޯޑު މެންބަރަކު މަގާމުން ވަކިކޮށްފި