ހާދިސާ ހިނގިތާ 8 ދުވަސް ފަހުން ވަނަވަރު އާންމުކުރި އެންމެންގެ ފޯނު ހިފަހައްޓައިފި

އެޕްރީލް 18 ދުވަހުގެ ފަތިހު ހ. ފެންޓެނޯއީ ގޭގެ މަތިން ވެއްޓުނު ހައްވާ ޔުމްނު ރަޝީދު 21، އާއި އޭނާ އާއެކު އެ ގޭގައި އުޅުނު ރައުދު އަަހުމަދު ޒިލާލް 21، ހިމެނޭ ހެން މި މައްސަލާގައި ފުލުހުން ވަނަވަރު ހާމަކުރި އެންމެންގެ ފޯނުތައް ތަހުގީގަށް ހިފަހައްޓައިފި އެވެ.

ޔުމްނު ވެއްޓުމުގެ ކުރިން ދިޔަ ޕާޓީގައި އުޅުނު ކަމަށް ފުލުހުން ބުނާ މީހުންގެ ފޮޓޯއާއި ވަނަވަރު ވަނީ އާންމުކޮށްފަ އެވެ. އެ އެންމެންގެ ފޯނު އަތުލުމަށް މިދިޔަ ބުރާސްފަތި ދުވަހު ކޯޓު އަމުރެއް ހޯދި އެވެ. ނަމަވެސް ނަމަވެސް މިއަދާ ހަމައަށް ފުލުހުން ހިފަހައްޓާފައި އޮތީ ހަތް މީހުންގެ ފޯނެވެ.

އިތުރު ދެ މީހެއްގެ ފޯނު ހިފެހައްޓާފައިވާކަން ފުލުހުން ކަށަވަރުކޮށްދިނީ މިއަދު އެވެ. އަމުރު ނެރުނުތާ އެއް ދުވަސް ފަހުން ފޯނު ހިފެހެއްޓީ ކޮން ދެ މީހެއްގެ ކަމެއް ނޭނގެ އެވެ.

މި މައްސަލައާ ގުޅިގެން ޔުމްނު ދިޔަ ޕާޓީގައި ބައިވެރިވި ކަމަށް ބުނާ މީހުންގެ ފޯނު ހިފެހެއްޓި ނަމަވެސް ހައްޔަރުކޮށްފައި ވަނީ ރައުދު އެކަންޏެވެ. އޭނާގެ ބަންދަށް ކްރިމިނަލް ކޯޓުން އިއްޔެ ވަނީ ފަސް ދުވަސް ޖަހައިފަ އެވެ.

ޔުމްނު ވެއްޓުމުގައި ރައުދުގެ ބައިވެރިވުމެއް ނެތް ކަމަށް މީގެ ކުރިން ފުލުހުން ބުނި ނަމަވެސް، ވެއްޓުމުގެ ކުރިން އެ ދެ މީހުންގެ ދެމެދު ހަމަނުޖެހުމެއް ހިނގި ކަމަށް ފުލުހުން ކޯޓުގައި ބުނެފައިވެ އެވެ.