ފަޅަށް ހުންނަތާ ގިނަ ދުވަސްތަކެއް ވެފައިވާ އޯކިޑް ޕްލާޒާ ތަޅާލުމުގެ މަސައްކަތް ފަށައިފި

އޯކިޑް ޕްލާޒާ ތަޅާލުމުގެ މަސައްކަތް މިއަދު ފަށައިފި އެވެ.

ޕަބްލިކްސް ވޯކްސް މިނިސްޓްރީން އެކްސްގައި ކުރި ޕޯސްޓެއްގައި ބުނީ ‏އާންމުންނަށް ގެއްލުމެއް ވެދާނެ ކަމަށް ފެންނާތީ، މާފަންނު އޯކިޑް ޕްލާޒާ އިމާރާތް ތަޅާލުމުގެ މަސައްކަތް މިހާރު ފަށާފައިވާ ކަމަށެވެ.

އެ މަސައްކަތް މިއަދު ފެށުމާ އެކު މަސައްކަތް ކުރިއަށް ގެންދާ ގޮތް ބައްލަވާލެއްވުމަށް މިނިސްޓަރު އާދަމް ޝަރީފު އުމަރު އެ ސަރަހައްދަށް ވަޑައިގެންނެވި ކަމަށް ވެސް މިނިސްޓްރީން ބުންޏެވެ

ބުރުޒު މަގުގައި ހަތަރު ފްލޯއަށް ހުންނަ އޯކިޑް ޕްލާޒާއަކީ ސަރުކާރުގެ ކުރީ ޝިޕިން ކުންފުނި، އެމްއެންއެސްއެލް އިން އިމާރާތްކޮށް މީހުން ދިރިއުޅެން ކުއްޔަށް ދޭން ހެދި ތަނެކެވެ. ނަމަވެސް، އެތަނުގައި ދިރިނޫޅެވޭ ވަރަށް އިމާރާތް ބާވުމުން، އެތަނުން މީހުން ނެރެ ފަޅަށް ދޫކޮށްލާފައި އޮންނަތާ މިހާރު އެތައް އަހަރެއް ވެއްޖެ އެވެ.

ފަޅަށް ހުރި އެ އިމާރާތުގެ ތެރެއަށް އޭގެ ފަހުން މަސްތުވާތަކެތި ބޭނުންކުރާ މީހުން ވަދެ އުޅޭ މައްސަލަ ވެސް ވަރަށް ބޮޑުވި އެވެ. އަދި އެމީހުންގެ ސަބަބުން އެތަނުގައި އަލިފާނުގެ ބައެއް ހާދިސާތައް ވެސް ހިނގި އެވެ.