އެއްބަސްވުމާ ހިލާފަށް ކުއްޔަށް ދީފައިވޭތޯ ބަލަން ފްލެޓްތައް ބަލައި ފާސްކުރަން ފަށަނީ

ސަރުކާރުން ދޫކުރާ ސޯޝަލް ހައުސިން ފްލެޓުތައް ގަވައިދާ ޚިލާފަށް ކުއްޔަށް ދޭ މައްސަލަ ބޮޑުވެފައިވުމުން، އެފަދަ ފުލެޓުތައް ހޯދައި އަތުލުމަށް، ފުލެޓުތައް ބަލައި ފާސްކުރުމުގެ މަސައްކަތް ވީހާވެސް އަވަހަށް ފަށަން ނިންމައިފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.

ކުރީ ސަރުކާރުގެ ގެދޮރުވެރިޔާ ސްކީމުގެ ދަށުން ހުޅުމާލެ ދެވަނަ ފިޔަވަހީގައި ހަދާފައިވާ 4،000 ފުލެޓުތަކުގެ ތަޅުދަނޑި ހަވާލުކުރަން ފެށުމާއެކު، އެ ފުލެޓުތައް ބޮޑު އަގުގައި ކުއްޔަށް ދިނުމަށް އިޝްތިހާރު ކުރަން ފަށާފައިވާ މައްސަލަތަކެއް ވަނީ ފެންމަތިވެފަ އެވެ. އެ މައްސަލަ ފެންމަތިވި އިރު، ހިޔާ ފުލެޓުތަކަށް ދައްކަންޖެހޭ ކުއްޔަށްވުރެ މާބޮޑު އަގުތަކުގައި އެހެން މީހުންނަށް ކުއްޔަށް ދީގެންވެސް އުޅެ އެވެ.

އެ މައްސަލައާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި މުއްތަލިބު ވިދާޅުވީ، ސަރުކާރުގެ އިޖުތިމާއީ ބޯހިޔާވަހިކަމުގެ ތެރެއިން ދޫކޮށްފައިވާ ތަންތަނަކީ ރައްޔިތުންގެ ފައިސާއިން ބޮޑު ހޭދައެއްކޮށް، ސަބްސިޑައިޒްކޮށްފައިވާ އަގުތަކެއްގައި ދޫކޮށްފައިވާ ތަންތަން ކަމަށެވެ

އެހެންވެ، އެ ތަންތަން ބޮޑެތި އަގުތަކުގައި ކުއްޔަށްދީ، އެ ތަންތަނުގެ ވެރިފަރާތް ފިޔަވާ އެހެން ބަޔަކު ދިރިއުޅުމަށް ނުވަތަ އެހެން ބޭނުމަކަށް ވެސް ބޭނުންކުރުމަކީ ސަރުކާރުން ގަބޫލުކުރާ ކަމެއްނޫން ކަމަށް މުއްތަލިބު ވިދާޅުވިއެވެ.

”އެހެންކަމުން އެއްބަސްވުންތަކާ ޚިލާފަށް ކުއްޔަށް ދީފައިވާ ތަންތަނާއި، އެ ތަންތަން ދެވިފައިވާ ފަރާތްނޫން އެހެން ފަރާތެއް ދިރިއުޅޭ ތަންތަނުގެ އެއްބަސްވުންތައް ބާޠިލްކޮށް އެ ތަންތަން ދައުލަތަށް ނެގުމަށް ކުރަންޖެހޭ މަސައްކަތްކުރުމަށް ސަރުކާރުން ވަނީ ނިންމާފައެވެ.“ އޭނާ ވިދާޅުވިއެވެ.

މުއްތަލިބު ވިދާޅުވީ، ހައުސިން މިނިސްޓްރީން އަންނަނީ، ސޯޝަލް ހައުސިންގެ ގޮތުގައި ދޫކޮށްފައިވާ ތަންތަން ބަލައި ފާސްކުރުމުގެ މަސައްކަތް، ކަމާ ގުޅުންހުރި އިދާރާތަކާ ގުޅިގެން ވީހާ ވެސް އަވަހަކަށް ފެށުމަށް މަސައްކަތް ކުރަމުން ކަމަށެވެ.