މާލެ އާއި އެހެން ރަށްތަކަކީ އަޅުގަނޑުގެ ކުރިމަތީގައި ހަމަހަމަ ރަށްތަކެއް: ރައީސް

މާލެ އާއި ރާއްޖޭގެ އެހެން ރަށްތަކަކީ އެ މަނިކުފާނުގެ ކުރިފުޅުމަތީގައި ހަމަހަމަ ރަށްތަކެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ސަރުކާރު ހިންގާ ޕީއެންސީން ރޭ އާޓިފިޝަލް ބީޗުގައި ބޭއްވި އެއްވުމުގައި ރައީސް ވިދާޅުވީ, ތަރައްގީ ކުރަން ޖެހޭނީ ހަމައެކަނި މާލެ އާއި ސިޓީތަކާއި އަތޮޅުވެރިކަން ކުރާ ރަށްތަކުގައި އެކަނި ނޫން ކަމަށެވެ.

އެގޮތުން ރައީސް މައުމޫން އަބްދުލްގައްޔޫމަށްފަހު އެއްވެސް ރައީސަކު ވަޑައިނުގަންނަވާ ރަށްތަކަށް އެ މަނިކުފާނަށް ޒިޔާރާތް ކުރެއްވުނު ކަމަށާއި އެ ދަތުރުފުޅުތަކުން ފެނުނީ އެ ރަށްތަކާމެދު އިހުމާލުވެފައިވާ މިންވަރު ކަމަށް ރައީސް ވިދާޅުވި އެވެ.

ރައީސް ވިދާޅުވީ, މާލެ އާއި ރާއްޖޭގެ އެހެން ރަށްތަށް އެ މަނިކުފާނަށް ހަމަހަމަ ކަމަށާއި އެ މަނިކުފާނުގެ ކުރިފުޅުމަތީގައި އެ ރަށްރަށުގައި ތިބި ދިވެހި ރައްޔިތުންނަކީ ސިޓީތަކާއި ވެރިކަން ކުރާ މާލޭގެ ރައްޔިތުންނާ އެއް ހަމަ ރައްޔިތުން ކަމަށެވެ.

އެ މަނިކުފާނު ވިދާޅުވި ގޮތުގައި ރާއްޖޭގެ ހުރިހާ ރަށެއްގައި އޭޓީއެމް އާއި ފުލުހުންގެ ހިދުމަތް އަދި ދެން ހުރި ކަންކަން ވެސް މި ސަރުކާރުން ކުރަމުން ގެންދަނީ ހަމަހަމަކަމާއެކު ތަރައްގީ ގެނެސްދެއްވަން ކަމަށެވެ.