ސީރިއާގެ ހަނގުރާމައަށް ގޮސް ތާށިވި އަންހެނަކާއި އޭނާގެ 14 އަހަރުގެ ދަރިފުޅު ރާއްޖެ ގެނެސްފި

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ ހަނގުރާމަތަކުގައި ބައިވެރިވާން ރާއްޖެއިން ދިޔަ ބައެއް މީހުންނާއި އެފަދަ މީހުން ގެންދިޔަ އާއިލާގެ މީހުން ރާއްޖެ ނާދެވި ހާލުގައި ޖެހިފައި އެބަ ތިބި ކަމަށެވެ. އެ މީހުން ރާއްޖެ ގެންނަން ރައީސް ޑރ. މުހައްމަދު މުއިއްޒު އަންގާފައިވާތީ އެ މަސައްކަތް ކުރަމުން އަންނަ ކަމަށް ވިދާޅުވި އެވެ.

އިހުސާން ވިދާޅުވީ، ސީރިއާގެ ދެ ސަރަހައްދެއްގައި ތިބި 60 ވަރަކަށް މީހުން ގެނައުމުގެ މަސައްކަތާއި އެހެން ބައެއް ގައުމުތަކުގައި ތާށިވެފައި ތިބި މީހުން ގެނައުމުގެ މަސައްކަތް ވެސް ސަރުކާރުން ދަނީ ކުރަމުންނެވެ. އެގޮތުން ސީރިއާ ހަނގުރާމައަށް ގޮސް ފަހުން ތުރުކީއަށް ހިޖުރަކުރުމުން އެ ގައުމުން ހިފަހައްޓާފައި ތިބި ދިވެހި ތިން ރައްޔިތެއްގެ މައުލޫމާތު އެ ގައުމުން ދިވެހި ސަރުކާރަށް އަންގާފައިވާ ކަމަށް ވިދާޅުވި އެވެ.

އިހުސާން ވިދާޅުވީ، ތުރުކީގައި ހިފަހައްޓާފައި ތިބި ތިން ދިވެހިންގެ ތެރެއިން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެ ގެނެސް ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ)ގައި އެ މީހުންނަށް ފޯރުކޮށްދޭންޖެހޭ ކަންކަން ފޯރުކޮށްދެމުން އަންނަ ކަމަށެވެ.

އެންއާރުސީ އަކީ ރާއްޖޭގައި ޓެރަރިޒަމް މަނާކުރާ ގާނޫނުގައި ބަޔާންކުރާ ކަހަލަ ހަނގުރާމަވެރި ސަރަހައްދުތަކުން ނުވަތަ އެ ކަހަލަ ހަނގުރާމައެއްގައި ބައިވެރިވުމަށް ފަހު، އަނބުރާ ރާއްޖެ އަންނަ ނުވަތަ ގެނެވޭ މީހުން މުޖުތަމައު އަށް ދިއުމުގެ ކުރިން ރިހެބިލިޓޭޝަން އަދި ރިއިންޓެގްރޭޝަން ޕްރޮގްރާމް ހިންގުމަށް ކަނޑައަޅާފައިވާ މަރުކަޒެވެ.