އައްޑޫގެ ކަރަންޓުގެ މައްސަލަ ހައްލުކުރަން ޗައިނާ ކުންފުންޏަށް ދިން މަޝްރޫއު މިފަހަރު ދުބާއީ ކުންފުންޏަކަށް

އައްޑޫގެ ކަރަންޓުގެ މައްސަލައަށް ދާއިމީ ހައްލެއް ހޯދުމަށް އެ ސިޓީގައި ހަދާ ސެންޓްރަލް ޕަވާ ސްޓޭޝަން (ސީޕީއެސް) ގާއިމުކޮށް ނިންމުމަށް، ފެނަކަ ކޯޕަރޭޝަނުން ދުބާއީގެ ކުންފުންޏާ ހަވާލުކޮށްފި އެވެ.

ފެނަކަ ހެޑް އޮފީހުގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރު މުހައްމަދު ނަޖާހު އެވެ. އެ މަސައްކަތް ހަވާލުކުރި ދުބާއީގެ ޑެފިނިޓް ސޮލިއުޝަންސްގެ ފަރާތުން ސޮއިކުރެއްވީ ފައުންޑަރު އަދި ސީއީއޯ އަބްދުﷲ ސައީދެވެ.

ނަޖާހުއާ ހަވާލާދީ ޕީއެސްއެމްގައި ބުނެފައިވާ ގޮތުން، 31 މިލިއަން ޑޮލަރުގެ މި މަޝްރޫއުގެ ދަށުން ޕަވާ ސްޓޭޝަންގެ ހުރިހާ މަސައްކަތެއް ކުރުމުގެ އިތުރުން އިންޖީނުތައް ބަހައްޓައި އޮޕަރޭޝަނަށް ގެނައުމުގެ މަސައްކަތްވެސް ކުރުމަށް ހަމަޖެހިފައިވާ ކަމަށެވެ.

އަދި މި މަޝްރޫއުގެ މަސައްކަތް އަންނަ އަހަރުގެ ނިޔަލަށް ނިންމާލެވޭނެ ކަމަށްވެސް ވިދާޅުވެފައިވެ އެވެ.

ފެނަކައާ ހަވާލާދީ ޕީއެސްއެމްގައި އިތުރަށް ބުނެފައިވަނީ، މި މަޝްރޫއުގެ ދަށުން ޕަވާ ސްޓޭޝަންގައި ބަހައްޓާނީ ބެލްޖިއަމް ކުންފުންޏެއް ކަމަށްވާ އަންގްލޯ ބެލްޖިއަން ކޯޕަރޭޝަން (އޭބީސީ)ގެ އިންޖީނުތަކެކެވެ. ޔޫރަޕްގައި ބޭނުންކުރާ މި ބްރޭންޑްގެ އިންޖީނުތަކަކީ، މިހާރު އައްޑޫގައި ބޭނުންކުރާ ހައި ސްޕީޑް އިންޖީނުތަކާ ހިލާފަށް ލޯ ސްޕީޑް ޒަމާނީ އިންޖީނުތަކެކެވެ.

އަންނަ މަހު ބާއްވާ ލޯކަލް ކައުންސިލް އިންތިހާބާ ދިމާކޮށް އައްޑޫގެ ކަރަންޓުގެ މައްސަލަ ހައްލުކުރަން ދުބާއީގެ ކުންފުންޏަކާ ހަވާލުކުރި އިރު، އައްޑޫގެ އާ އިންޖީނުގެ އެޅުމުގެ މަޝްރޫއުއެއް ހިންގަން 2024 ވަނަ އަހަރު ޗައިނާގެ ޑޮންފަން ކުންފުންޏާ ހަވާލުކުރި އެވެ. ނަމަވެސް، އެ މަޝްރޫއު ކުރިއަށް ނުގެންދާތީ އެ އެއްބަސްވުން މިހާރު ވަނީ ބާތިލުކޮށްފަ ކަމަށް ފެނަކަ އިން ބުނެ އެވެ.