މިސްރުން ވޯލްޑް ކަޕްގެ ތާރީހުގައި ފުރަތަމަ ފަހަރަށް މެޗަކުން މޮޅުވެ، ނިއު ޒިލޭންޑް 3-1 އިން ބަލިކޮށް ގްރޫޕް ޖީގެ އެއްވަނައަށް ޖެހިލައިފިއެވެ.
ކެނެޑާގެ ވެންކޫވާގައި ހުންނަ ބީސީ ޕްލޭސް ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ނިއު ޒިލޭންޑުން ލީޑު ނެގީ 15 ވަނަ މިނެޓުގައި ޓިމް ޕެއިންގެ ކޯނަރަކުން ފިން ސާމަންގެ ބޮލުން ޖެހި ގޯލަކުންނެވެ. ފުރަތަމަ މެޗުގައި ދެ ގޯލު ޖެހި އެލައިޖާ ޖަސްޓް ވެސް ނިއު ޒިލޭންޑުގެ އެޓޭކުގައި މޮޅު ކުޅުމެއް ދެއްކިއެވެ. ފުރަތަމަ ހާފުގައި މިސްރުގެ ޓީމަށް ބޯޅަ ގެންގުޅުމުގައި ގޯސްތައް ހެދި މުހައްމަދު ސަލާހް އާއި އުމަރު މާމޫޝްއަށް ބޯޅަ ފޯރުކޮށްދިނުމުގައި ދަތިތަކާ ކުރިމަތިވިއެވެ.
ނަމަވެސް ދެވަނަ ހާފުގައި ކޯޗު ހުސާމް ހަސަން ކުރިއަށް އިތުރު ކުޅުންތެރިން ފޮނުވައި މިސްރުން ވަރުގަދަ ކުޅުމެއް ދައްކައި ދެ ގޯލު ޖަހައި ނަތީޖާ އަނބުރާލިއެވެ. މެޗުގެ 58 ވަނަ މިނެޓުގައި މުސްތަފާ ޒީކޯ ނިއު ޒިލޭންޑުގެ އޭރިއާ ތެރެއިން ހުސްކޮށް ހުރެ ބޮލުން ފޮނުވާލި ބާރު ހަމަލާއިން ނަތީޖާ ހަމަހަމަކުރިއެވެ.
މެޗުގެ 67 ވަނަ މިނެޓުގައި ޓީމުގެ ކެޕްޓަން މުހައްމަދު ސަލާހް ޖެހި ހިތްގައިމު ގޯލަކުން މިސްރަށް ލީޑު ނަގައިދިނެވެ. ސަލާހް ޒީކޯއާ ގުޅިގެން ބޯޅަ ކުރިއަށް ގެންގޮސް ޒީކޯގެ މޮޅު ފްލިކަކުން ސަލާހަށް ބޯޅަ ލިބި ގޯލުގެ ކަނަކަށް ބޯޅަ އަމާޒުކޮށްލީއެވެ. މެޗުގެ 81 ވަނަ މިނެޓުގައި ސަލާހް ނަގައިދިން ކޯނަރަކުން ބަދަލު ކުޅުންތެރިޔާ ޓްރެޒެގޭ ބޮލުން ޖަހައި ތިންވަނަ ގޯލު ކާމިޔާބުކޮށް މެޗުގެ ނަތީޖާ ކަށަވަރުކުރިއެވެ.
ވޯލްޑް ކަޕް މެޗެއްގައި މިސްރުން ތިން ގޯލު ޖެހި މިއީ ފުރަތަމަ ފަހަރެވެ. އުމުރުން 34 އަހަރުގެ ސަލާހް، ވޯލްޑް ކަޕްގައި ޖެހި މިއީ ތިންވަނަ ގޯލެވެ. އެންމެ ފަހުން ވޯލްޑް ކަޕްގައި ސަލާހު ޖެހި ގޯލަކީ، ވޯލްޑް ކަޕް 2018 ގައި ސައޫދީ އަރަބިއްޔާއާ ދެކޮޅަށް ޖެހި ގޯލެވެ. މި ގޯލާއެކު ސަލާހް ގައުމީ ޓީމަށް 68 ގޯލު ހަމަކޮށް ކޯޗު ހުސާމް ހަސަންގެ އޯލް-ޓައިމް ރެކޯޑާ ދެމެދު ހުރީ އެންމެ އެއް ގޯލެވެ.
މިއީ ވޯލްޑް ކަޕްގެ ތާރީހުގައި މިސްރުގެ ހަތަރުވަނަ ފެނިލުމެވެ. 1934 ވަނަ އަހަރު އެފްރިކާ ބައްރުން ފުރަތަމަ ވޯލްޑް ކަޕަށް ކޮލިފައިވި ޓީމަކީ ވެސް މިސްރެވެ. ނަމަވެސް މީގެ ކުރިން ދުވަހަކު ވެސް ވޯލްޑް ކަޕް މެޗަކުން މޮޅުވެފައެއް ނުވެއެވެ. ނިއު ޒިލޭންޑަށް ވޯލްޑް ކަޕްގެ ތާރީހުގައި އަދި މޮޅެއް ހޯދިފައެއް ނުވެއެވެ.
މި މޮޅާއެކު މިސްރު ހަތަރު ޕޮއިންޓާއެކު ގްރޫޕް ޖީގެ އެއްވަނައިގައި އޮތް އިރު، ފަހު މެޗުގައި އީރާނާ ދެކޮޅަށް ބަލިނުވެ ނިންމާލައިފި ނަމަ، ދެވަނަ ބުރަށް ދަތުރުކުރެވޭނެއެވެ. ނިއު ޒިލޭންޑަށް ވެސް އަދި އުންމީދު ގެއްލިފައެއް ނުވެއެވެ. ފަހު މެޗުގައި ބެލްޖިއަމް ބަލިކޮށްފިނަމަ ނޮކްއައުޓް ބުރަށް ދެވިދާނެއެވެ.
