އެމެރިކާ، ކެނެޑާ އަދި މެކްސިކޯގައި ނިމިގެންދިޔަ ވޯލްޑް ކަޕް 2026 އަކީ 48 ޓީމު ބައިވެރިވެގެން 104 މެޗު ކުޅެވުނު، ތާރީހުގައިވެސް ބޭއްވުނު އެންމެ ބޮޑު ވޯލްޑް ކަޕް މުބާރާތެވެ. މި މުބާރާތް ނިމިގެންދިޔައީ ފައިނަލްގައި ސްޕެއިނުން އާޖެންޓީނާ ބަލިކޮށް ޗެމްޕިއަންކަން ހޯދުމާއެކުގައެވެ. ކުޅުމުގެ ފެންވަރާއި، އިންތިޒާމުތަކާއި، އަދި ދިމާވި ގޮންޖެހުންތަކަށް ބަލައި މި މުބާރާތަށް ދެވިފައިވަނީ 10 އަކުން 8.8 ގެ ރޭޓިންގެކެވެ.

ކުޅުމުގެ ފެންވަރާއި މުނިފޫހިފިލުވުން

• ކުޅުމުގެ ފެންވަރު: 9.5/10
• މުނިފޫހިފިލުވުން: 9.5/10

ޓީމުތައް އިތުރުވުމުން ކުޅުމުގެ ފެންވަރު ދަށްވެދާނެކަމަށް ބެލެވުނު ނަމަވެސް، ކުދި ގައުމުތަކުން ދެއްކި ހިތްވަރާއެކު ވާދަވެރިކަން ވަރަށް ބޮޑުވިއެވެ. ކޭޕް ވާޑް، މޮރޮކޯ، ނޯވޭ އަދި ޕެރަގުއާއީ ފަދަ ގައުމުތަކުން ބޮޑެތި ޓީމުތަކަށް ވަރުގަދަ ގޮންޖެހުންތަކެއް ކުރިމަތިކުރިއެވެ.

ގިނަ ހައިރާންކުރުވަނިވި ނަތީޖާތަކާއި، ޕެނަލްޓީ ޝޫޓްއައުޓްތަކާއި، ފަހު ވަގުތުގެ ގޯލުތަކުން މުބާރާތް ފުރިގެންދިޔައެވެ. މުބާރާތުގެ ގަދަ 16 އާ ހިސާބަށް މެޗުތައް ކޮންމެ ދުވަހަކު ކުޅެވެމުންދިއުމުން ސަޕޯޓަރުންނަށް މުނިފޫހިފިލުވުމުގެ މެދުކެނޑުމެއްނެތް އުފާވެރިކަމެއް ލިބިގެންދިޔައެވެ.

48 ޓީމުގެ ފޯމެޓާއި ސަޕޯޓަރުންގެ އަދަދު

• 48 ޓީމުގެ ފޯމެޓް: 8/10
• ސަޕޯޓަރުންގެ އަދަދު: 9.5/10

ގިނަ ގައުމުތަކަކަށް ފުރުސަތު ލިބުމަކީ ރަނގަޅު ކަމެއް ނަމަވެސް، 104 މެޗު ކުޅެން ޖެހުމުން މުބާރާތް ދިގުލައިގެންދިޔައެވެ. އަދި ގްރޫޕް ސްޓޭޖުގައި ތިންވަނައަށްދާ ޓީމުތައް ހޮވާ އުސޫލުގެ ސަބަބުން ކުޅުމުގެ ފޯރި ކޮންމެވެސް ވަރަކަށް ކުޑަވިއެވެ.

ތާރީހީ ގޮތުން އެންމެ ގިނަ ސަޕޯޓަރުން ވަދެފައިވާ މުބާރާތަށް މި މުބާރާތް ވިއެވެ. 6.25 މިލިއަނަށްވުރެ ގިނަ ސަޕޯޓަރުން ދަނޑުތަކަށް ވަނެވެ. އެމެރިކާ، ކެނެޑާ އަދި މެކްސިކޯގެ ސަގާފަތްތައް އެކުވެގެން ހިތްގައިމު މާހައުލެއް އުފެދުނެވެ.

އިންތިޒާމުތަކާއި ދަތުރުފަތުރުގެ ގޮންޖެހުންތައް

• އިންތިޒާމުތައް: 7.5/10

ދަނޑުތަކުގެ ވަސީލަތްތަކާއި، ބްރޯޑްކާސްޓިން ފެންވަރު ވަރަށް ފުރިހަމައެވެ. ނަމަވެސް، ތިން ގައުމުގެ ދެމެދުގައި ހުރި ދުރުމިނުގެ ސަބަބުން ޓީމުތަކަށާއި ސަޕޯޓަރުންނަށް ދަތުރުފަތުރުގެ ގިނަ ދަތިތަކަކާއި ބޮޑެތި ހަރަދުތަކެއް ކުރިމަތިވިއެވެ. ކޮމްޕެކްޓް މުބާރާތްތަކާ ހިލާފަށް، މި މުބާރާތުގައި އެއް ސިޓީން އަނެއް ސިޓީއަށް ދަތުރުކުރުމަށް އެތައް ހާސް ކިލޯމީޓަރެއްގެ ދަތުރުކުރަން ޖެހުނެވެ. އޭގެ އިތުރުން އީރާން ފަދަ ޓީމުތަކަށް ވިސާ ނުލިބުނު މައްސަލަ ވެސް ފާހަގަވެގެންދިޔައެވެ.

ޓިކެޓުގެ އަގާއި ވިޔަފާރީގެ ނުފޫޒު

• ޓިކެޓުގެ އަގުހެޔޮކަން: 5.5/10
• ވިޔަފާރި އުސޫލުތައް: 6.5/10

މިއީ މުބާރާތުގެ އެންމެ ބޮޑު ނާކާމިޔާބީއެވެ. ޓިކެޓުގެ އަގުތައް އާދަޔާހިލާފަށް ބޮޑުވުމުގެ ސަބަބުން އާދައިގެ ސަޕޯޓަރުންނަށް މެޗުތައް ބަލައިލުމުގެ ފުރުސަތު ގެއްލުނެވެ. މީގެ އިތުރުން މުބާރާތް މާ ބޮޑަށް ވިޔަފާރިވެރިކޮށް، މެޗުގެ ހާފްޓައިމްގައި ބޭއްވި ދިގު މުނިފޫހިފިލުވުމުގެ ޝޯތަކުގެ ސަބަބުން ފުޓްބޯޅައިގެ އަސްލު ރޫހަށް ބުރޫއެރިއެވެ.

ޓެކްނޮލޮޖީއާއި ކުޅުންތެރިންގެ ސަލާމަތްތެރިކަން

• ހައިޑްރޭޝަން ބްރޭކްތައް: 7/10
• ޓެކްނޮލޮޖީއާއި ރެފްރީންގެ ނިންމުން: 8/10

ހޫނުގަދަވުމުގެ ސަބަބުން ކުޅުންތެރިންގެ ރައްކާތެރިކަމަށް އެޅި ފިޔަވަޅެއް ނަމަވެސް، މިއީ ކޯޗުންގެ ޓެކްޓިކަލް ވަގުތުކޮޅަކަށް ބަދަލުވެ، މެޗުގެ ފޯރި ކެނޑުމަށް މެދުވެރިވިއެވެ. ވީއޭއާރް އަދި ސެމީ-އޮޓޮމޭޓެޑް އޮފްސައިޑް ސިސްޓަމްތަކުގެ ސަބަބުން ނިންމުންތައް އަވަސްވި ނަމަވެސް، ރެފްރީންގެ ނިންމުންތަކުގެ އެއްގޮތްކަމާ މެދު އަދިވެސް ސުވާލު އުފެދުނެވެ.

ތާރީހީ ހަނދާންތަކާއި މުބާރާތުގެ ކާމިޔާބީ

• ރޭޓިން: 10/10

ލިއޮނަލް މެސީ އާއި ކްރިސްޓިއާނޯ ރޮނާލްޑޯގެ ފަހު ވޯލްޑް ކަޕާއި، ލަމީން ޔަމާލް ފަދަ ޒުވާން ތަރިންގެ ފެށުމާއި، އިންގްލެންޑާއި ފްރާންސްގެ ކުރިމަތިލުމުގެ ސަބަބުން މި މުބާރާތް ތާރީހުގައި ރަން އަކުރުން ލިޔެވިގެންދާނެއެވެ. މިއީ ޖީލުތަކުގެ ބަދަލުވުން ދައްކުވައިދިން މުބާރާތެކެވެ.

މުބާރާތުގައި އެންމެ ގޯސްކޮށް ފެނިގެންދިޔައީ ޓިކެޓުގެ އަގާއި ވިޔަފާރީގެ ނުފޫޒާއި އިންތިޒާމުތައް އަދި ހައިޑްރޭޝަން ބްރޭކެވެ. އޭގެ އިތުރުން ޓެކްނޮލޮޖީއާއެކު ހަގީގީ ފުޓުބޯޅަ ގެއްލެމުންދިޔަތަން ފެނިގެންދިޔައެވެ. އެހެންކަމުން ކުރިއަށްއޮތް ތަނުގައި ފީފާގެ މި ކަންކަމަށް ވަނީ ބަދަލުތަކެއް ގެންނަން ޖެހިފައެވެ. އަދި މުބާރާތުގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕްގެ ނުފޫޒުގައި ޖެހުނު ކަމަށްބުނެ، ފީފާއަށް އަމާޒުވި ތުހުމަތުތަކަށް ރަނގަޅު ޖަވާބުތަކެއް ދޭން ޖެހެއެވެ.