ޒުވާބެއްގެ ތެރެއިން ލޯބިވެރިޔާއަށް ވަޅިން ހަމަލާ ދިންކަމުގެ ތުހުމަތަށް މީހަކު ހައްޔަރަށް

ލޯބިވެރިޔާއަށް ވަޅިން ހަމަލާ ދިން ކަމުގެ ތުހުމަތުގައި ހައްޔަރުކުރި މީހަކު 30 ދުވަހަށް ބަންދު ކުރަން ކްރިމިނަލް ކޯޓުން އިއްޔެ އަމުރުކޮށްފި އެވެ.

މާރާމާރީ ހިންގުމުގެ ތުހުމަތުގައި ފުލުހުން ހައްޔަރުކުރީ ގދ. ތިނަދޫގެ 22 އަހަރުގެ ޒުވާނެކެވެ.

އޭނާ ބަންދުކުރަން ކޯޓުން ނެރުނު އަމުރުގައި ބުނެފައިވާ ގޮތުން އޭނާއަކީ ކުރިން ހައްޔަރު ބަންދުގެ 26 ރެކޯޑް އޮތް މީހެކެވެ. އަދި އަނިޔާގެ އަމަލެއް އޭނާ ހިންގާފައިވާ ކަމަށް ބެލެވޭ ހެކި ފުލުހުން ކޯޓަށް ހުށަހަޅާފައިވާއިރު ޖިނާއީ ބޮޑު ދެ ކުށެއްގެ ދައުވާ އޭނާގެ މައްޗަށް ކުރެވޭނެ ކަމަށްވެސް ދައުލަތުން ބުނެފައިވެ އެވެ.

ކޯޓު އަމުރުގައިވާ ގޮތުން، އަނިޔާގެ ޝިކާރަައަށްވި އަންހެން މީހާއަކީ އޭނާގެ ލޯބިވެރިޔާކަން އޭނާ ކޯޓުގައި ދެއްކި ވާހަކަތަކުން އެނގޭ ކަމަށެވެ. އަދި ރުޅިއައިސްގެން ލޯބިވެރިޔާއާއި އޭނާއާ ދެމެދު ޒުވާބެއް ހިނގި ކަމަށްވެސް ބުނެފައިވެ އެވެ.

ނަމަވެސް އެއްވެސް އަނިޔާއެއް ކޮށްފައި ނުވާނެ ކަމަށް އޭނާ ކޯޓުގައި ބުނެފައިވެ އެވެ. އަދި އޭނާގެ ދަބަހުން ފެނުނު ވަޅިއަކީ އޭނާ ޑައިވިނަށް ދާއިރު ބޭނުންކުރަން ގެންގުޅޭ އެއްޗެއް ކަމަށް ކޯޓުގައި ބުނި ކަމަށް ކޯޓު އަމުރުން އެނގެ އެވެ.