ފަލަސްތީނު ރައްޔިތުން ކުރަމުންދާ ހިތްވަރަށް ތައުރީފު ކުރައްވާ ރައީސްގެ ހާއްސަ މެސެޖެއް

ފަލަސްތީނުގެ ރައްޔިތުން އަނިޔާވެރިކަމާއި ދެކޮޅަށް ދައްކަމުންދާ ހިތްވަރާއި ސާބިތު ކަމަށް ތައުރީފު ކުރައްވައި ރައީސް ޑރ. މުހައްމަދު މުއިއްޒު ހާއްސަ މެސެޖެއް ފޮނުއްވައިފިއެވެ.

ފަލަސްތީނުގެ މިނިވަންކަން އިއުލާނު ކުރިތާ 36 އަހަރު ފުރުމުގެ މުނާސަބަތުގައި، އެގައުމުގެ ރައީސް، ޑރ. މަހުމޫދު އައްބާސްއަށާއި ބޮޑުވަޒީރު އަދި ހާރިޖީ ވަޒީރު މުހައްމަދު މުސްތަފާއަށް ވަކިވަކިން ފޮނުއްވި ހާއްސަ މެސެޖެއްގައި ރައީސް ވިދާޅުވީ ފަލަސްތީނުގެ ރައްޔިތުން، އަނިޔާވެރިކަމާއި ބޭއިންސާފާ ދެކޮޅަށް ކުރަމުން ގެންދާ މަސައްކަތުގައިި، އެ ރައްޔިތުންގެ ސާބިތުކަމާއި ހިތްވަރުގަދަކަމަށް ނުހަނު ތައުރީފު ކުރައްވާ ކަމަށެވެ.

ރައީސް ވިދާޅުވީ ރާއްޖޭގެ އެއްބާރުލުން އަބަދުވެސް ފަލަސްތީނަށް ލިބެމުންދާނެ ކަމަށެވެ. އެ މަނިކުފާނު ވިދާޅުވީ 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިރަށް ކަމުގައި ކަނޑައަޅައިފައިވާ ފަލަސްތީނުގެ މިނިވަން އަދި އިސްތިގުލާލީ ދައުލަތަކަށް ރާއްޖެއިން އަބަދުވެސް ވަކާލާތުކުރައްވާނެކަމުގެ ޔަޤީންކަން ފަލަސްތީނުގެ ރައްޔިތުންނަށް ދެއްވާ ކަމަށެވެ.

ރައީސްގެ މެސެޖު ނިންމަވާލައްވަމުން، ފަލަސްތީނުގެ ރައީސް އަދި ބޮޑުވަޒީރު އަދި ފަލަސްތީނުގެ ރައްޔިތުންނަށް ދެމެހެއްޓެނިވި ސުލްހައާއި ކުރިއެރުމަށް އެދިވަޑައިގަންނަވާ ކަމަށް ވިދާޅުވިއެވެ.