ކުއްޖަކު ފެންވަރަން ހުއްޓައި ވީޑިއޯ ކޮށްގެން 20 އަހަރަށް ޖަލަށްލި މީހަކު ކޯޓުން މިނިވަންކޮށްފި

ކުޑަކުއްޖަކު ފެންވަރަން ހުއްޓައި ވީޑިއޯ ކުރި މައްސަލައެއްގައި 20 އަހަރަށް ޖަލަށްލި މީހެއްގެ ހުކުމް ހައިކޯޓުން ބާތިލުކުރުމުން މިނިވަންވެއްޖެ އެވެ.

އެ މައްސަލައާ ގުޅިގެން ދައުލަތުން ދައުވާކޮށްފައިވަނީ އަސްލަމް ހަސަން ކިޔާ ނަމަކަށް ކިޔާ މީހެއްގެ މައްޗަށެވެ. އޭނާގެ މައްޗަށް ދައުލަތުން ކޮށްފައިވަނީ ދިވެހިރާއްޖޭގައި އޮރިޔާންކާޑު ގެންގުޅުމުގެ ކުށުގެ ދައުވާ އާއި ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަ ގޮތަށް އޮރިޔާންކާޑު ހެދުމުގެ ދައުވާ އެވެ.

އެ ދައުވާތަކުގެ ތެރެއިން އޮރިޔާންކާޑު ގެންގުޅުމުގެ ކުށުގެ ދައުވާ ކުރީ އަސްލަމް ގެންގުޅުނު މޯބައިލް ފޯނު ތަހުލީލު ކުރި އިރު، އެ ފޯނުން އޮރިޔާން މަންޒަރު ދައްކުވައިދޭ 32 ވީޑިއޯ ފެނިފައިވާތީ އެވެ.

ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަ ގޮތަށް އޮރިޔާންކާޑު ހެދުމުގެ ދައުވާ އަސްލަމަށް ކުރީ 2018 ވަނަ އަހަރުގެ ފަހުކޮޅުގެ ދުވަހެއްގެ މެންދުރުގެ ވަގުތެއްގައި ކުޑަކުއްޖަކު ގިފިލީގައި ފެންވަރަށް ހުއްޓައި ގިފިލި ފާރުމަތިން އެ ކުއްޖާ ފެންވަރަން ހުރި މަންޒަރު ފޮޓޯ ނަގައި ވީޑިއޯ ކޮށްފައިވާ މައްސަލައިގެ ތުހުމަތުގައި އޭނާ ގެންގުޅުނު މޯބައިލް ފޯނު ތަހުލީލު ކުރި އިރު، ތުހުމަތު ކުރެވުނު ގޮތަށް އަންހެނަކު ބަރަހަނާކޮށް ފެންވަރަން ހުއްޓައި ނަގާފައިވާ ވީޑިއޯ ފެނިފައިވާތީ އެވެ.

އެ ދައުވާތަށް އަސްލަމްގެ މައްޗަށް ސާބިތުވެ 20 އަހަރަށް ޖަލަށް ލާން ހުކުމްކުރީ ލ. ގަމު މެޖިސްޓްރޭޓް ކޯޓުންނެވެ.

ދަށު ކޯޓުގެ އެ ހުކުމް އަސްލަމް ހަސަންގެ ފަރާތުން ވަނީ އިސްތިއުނާފުކޮށްފަ އެވެ. އޭނާގެ ފަރާތުން ހައިކޯޓުގައި ބުނީ ދަށު ކޯޓުގައި ކުރިއަށްދިޔަ ޝަރީއަތުގައި ކުއްޖާގެ ހެކިބަސް ނަގައިފައިނުވާ ކަމަށެވެ. ކުއްޖާގެ ހެކިބަސް ޝަރީއަތަށް ނެގުމެއް ނެތި ކުއްޖާގެ ބަސް ގަބޫލު ނުކުރެވޭނެކަން ސުޕްރީމް ކޯޓުތަކުގެ ބައެއް ގަޒިއްޔާތަކުން އެނގޭ ކަމަށެވެ.

އެކަމާ ގުޅިގެން ދައުލަތުން ބުނީ އަސްލަމް އެ ފާހަގަކުރާ ގަޒިއްޔާގައި ކުއްޖާގެ ހެކިބަސް ނެގުން ލާޒިމުކޮށްފައި ނުވާނެ ކަމަށާއި ހައިކޯޓުގެ މީގެ ކުރީގެ ގަޒިއްޔާއެއްގައިވެސް ކުއްޖާގެ ހެކިބަސް ނަގަން ނުޖެހޭނެ ކަމަށް ކަނޑައަޅާފައިވާ ކަމަށެވެ. އަދި އޭގެ ބަދަލުގައި މި މައްސަލައާ ގުޅިގެން ކުއްޖާގެ އޯޑިއޯ އަދި ވީޑިއޯ އިންޓަވިއު ހުށަހަޅާފައިވާނެ ކަމަށް ދައުލަތުން ބުންޏެވެ.

މި މައްސަލައިގައި ހިޔާލު ތަފާތުވީ އަސްލަމް ވީޑިއޯ ކުރީ އަންހެނެއްގެތޯ ނުވަތަ ކުޑަކުއްޖެއްގެތޯ އެވެ.

އެގޮތުން މައްސަލަ ހައިކޯޓުގައި މި މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު ހުސައިން މަޒީދު ވަނީ އަސްލަމްގެ މައްޗަށް ދަށު ކޯޓުގައި ކުރި ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަ ގޮތަށް އޮރިޔާންކާޑު ހެދުމުގެ ދައުވާ ސާބިތުކުރުމަށް ހުށަހަޅައިފައިވާ އޭނާގެ ފޯނުން ފެނުނު ވީޑިއޯތަކުގައި ”އަންހެނަކު“ ފެންވަރަން ހުއްޓައި ފެންނަ ވީޑިއޯއެއް ހިމެނޭ ކަމަށް ބަޔާންކޮށްފައިވާތީ އާއި ދައުލަތުން ކުރި މި ދައުވާގައި ”އަންހެނަކު“ ފެންވަރަން ހުރި ވީޑިއޯއެއް ފެނިފައިވާ ކަމަށް ބަޔާންކޮށްފައިވާތީ، އެކަން ކުޑަކުއްޖާއާ ގުޅެނީ ކިހިނަކުންތޯ ދައުލަތާ ސުވާލު ކުރައްވައިފަ އެވެ.

އެ ސުވާލުގެ ޖަވާބުގައި ދައުލަތުން ބުނީ ވީޑިއޯ އިން ފެންނަ ކުއްޖާއަކީ ހަމަ ހަގީގަތުގައިވެސް އަނިޔާ ލިބުނު ކަމަށް ބުނާ ކުއްޖާކަން ސާފުކޮށް ބަޔާންކޮށްދިނުމަކީ އެންމެ ރަނގަޅު ގޮތް ކަމަށް ގަބޫލުކުރާ ކަމަށެވެ. ނަމަވެސް އެފަދަ މައްސަލަތަކުގައި ކުދިންގެ ކަރާމާތަށްޓަކައި އެ މިންވަރަށް އެކަން ކުރުމުގައި ދަތިތަކެއް ހުރި ކަމަށެވެ.

ދައުލަތުން އިތުރަށް ބުނީ، އެ މައްސަލައިގައި ހުށަހެޅިފައިވާ އެހެނިހެން ހެކިތައް އެކުގައި ގުޅުވާލުމުން އެ ވީޑިއޯއަކީ މި މައްސަލައިގައި އަނިޔާ ލިބުނު ކުއްޖާގެ ވީޑިއޯއެއްކަން ސާފުވާނެ ކަމަށެވެ.

އެ ޖަވާބާ ގުޅިގެން ފަނޑިޔާރު ރައުޔުގައި ވިދާޅުވީ ދަށު ކޯޓަށް ހުށަހެޅުނު މޯބައިލް ފޮރެންސިކް ރިޕޯޓުގައި ވަނީ ”އަންހެނަކު“ ގިފިލީގައި ފެންވަރަން ހުރި ވީޑިއޯ އަސްލަމްގެ ފޯނުން ފެނިފައިވާ ކަމަށް ކަމަށެވެ. އެހެންކަމުން އެ ރިޕޯޓަށް އެކަނި ބަލާ އެ ވީޑިއޯގައި ފެންނަނީ އެ މައްސަލައިގައި ބުނާ ކުޑަކުއްޖާ ފެންވަރަން ހުރި މަންޒަރުތޯ ނުވަތަ އެހެން މީހަކު ފެންވަރަން ހުރި މަންޒަރުތޯ ސާފުނުވާ ކަމަށް ފަނޑިޔާރު ވިދާޅުވި އެވެ.

ފަނޑިޔާރު އިތުރަށް ވިދާޅުވީ މޯބައިލް ފޮރެންސިކް ރިޕޯޓުގައި ގިފިލީގައި ”އަންހެނަކު“ ފެންވަރަން ހުރި ވީޑިއޯއެއް ފެނިފައިވާ ކަމަށް ބަޔާންކޮށްފައިވާ އިރު، އެ މައްސަލައިގައި ދަށު ކޯޓަށް ހުށަހެޅުނު ހެކިތަކަށް އެކުގައި ރިއާޔަތްކޮށް ބެލި ނަމަވެސް، އެ ވީޑިއޯ އިން ފެންނަނީ މި މައްސަލައިގައި ހިމެނޭ ކުޑަކުއްޖާތޯ ކަށަވަރުކުރުމަށް ތަހުގީގުން މަރުހަލާގައި އެއްވެސް ކަމެއް ކޮށްފައިނުވާ ކަމަށެވެ.

”މިސާލަކަށް ކުއްޖާގެ މަންމަ ނުވަތަ ކުއްޖާ އާ ސުވާލުކޮށްގެން ނަމަވެސް ނުވަތަ ކުއްޖާގެ މޫނު ނުވަތަ ކުއްޖާގެ އެހެންވެސް ސިފައެއް އަޅައި ކިޔައިގެން ނަމަވެސް އެ ވީޑިއޯގައި ފެންނަނީ އެ ކުއްޖާކަން ނުވަތަ ކޮން އުމުރެއްގެ މީހެއްކަން ދަނެގަނެފައިވާކަން އެނގޭ ހެއްކެއް ދަށު ކޯޓަށް ހުށަހެޅިފައި ނެތެވެ،“ ފަނޑިޔާރު ވިދާޅުވި އެވެ.

އެހެންވެ ފަނޑިޔާރު ހުކުމްކުރެއްވީ އެ މައްސަލަ އަސްލަމްގެ މައްޗަށް ކުށް ސާބިތުވާ ކަމަށް ކަނޑައަޅާފައިވަނީ ގޯސްކޮށް ކަމަށެވެ. އެ ރައުޔަށް ފަނޑިޔާރު މުހައްމަދު ނިޔާޒް އަދި ފަނޑިޔާރު މުހައްމަދު ފައިސަލް ތާއީދު ކުރެއްވުމުން އަސްލަމްގެ މައްޗަށް ކުރި 20 އަހަރު ޖަލު ހުކުމް ބާތިލުކުރަން ހުކުމް ކުރި އެވެ.