ކަނޑުމަގުން ރާއްޖެ އެތެރެކުރަން އުޅުނު 400 ވޭޕް ސްޓިކް އަތުލައިގެންފި

ކަނޑުމަގުން ރާއްޖެ އެތެރެކުރަން އުޅުނު 400 ވޭޕް ސްޓިކް އަތުލައިގެންފި އެވެ.

މޯލްޑިވްސް ކަސްޓަމްސް އިން ބުނީ، އެ ތަކެތި އަތުލައިގަތީ ޖެނެރަލް ކާގޯގެ ގޮތުގައި ކަސްޓަމްސްއަށް ޑިކްލެއާ ކޮށްފައިވާ ޝިޕްމަންޓުގައި ހިމެނޭ މުދަލަތުގެ ތެރޭގައި ވޭޕް ސްޓިކް ފޮރުވާފައި ހުރި ކަމަށް ޝައްކު ކުރެވިގެން އިތުރަށް ބެލި ބެލުމުންނެވެ.

ކަނޑުމަގުން ރާއްޖެ އެތެރެކުރަން އުޅުނު 400 ވޭޕް ސްޓިކް އަތުލައިގެން އިރު، ފުލުހުން ރޭ ވަނީ ވޭޕް ވިއްކައި ވިޔަފާރިކުރާ ދެ ތަނެއް ރެއިޑްކޮށްފަ އެވެ.

ފުރަތަމަ ރެއިޑުގައި ވޭޕް ވިޔަފާރިކުރާ ކަމަށް ތުހުމަތުކުރެވޭ މީހާ ދިރިއުޅޭ ތަނާއި އޭނާ މަސައްކަތްކުރާ ކެފޭ ބަލައިފާސްކޮށް، 84 ވޭޕް ކާޓްރިޖާއި ވޭޕް ވިއްކައިގެން ހޯދާފައިވާ ކަމަށް ތުހުމަތު ކުރެވޭ ފައިސާ ހޯދާފައިވާ ކަމަށް ފުލުހުން ބުނެ އެވެ. އެ މައްސަލައާ ގުޅިގެން ފުލުހުން ހައްޔަރުކޮށްފައިވަނީ 27 އަހަރުގެ ބަންގްލަދޭޝް ރައްޔިތެކެވެ.

ދެވަނަ ރެއިޑުގައި ފުލުހުން ވަދެފައިވަނީ ގަލޮޅުގައި ހުންނަ ފިހާރައަކަށެވެ. އެތަނުން ގިނަ އަދަދެއްގެ ވޭޕް ފުލުހުން ހޯދި ނަމަވެސް މީހަކު ހައްޔަރު ކުރި ކަމަކަށް ފުލުހުން ނުބުނެ އެވެ.