ބޮޑު އިންޖީނުގެ ނިމުމުން 20 އަހަރަށް އައްޑޫގެ ކަރަންޓުގެ މައްސަލަ ހައްލުވާނެ: ރައީސް

އައްޑޫ ސިޓީގައި ސަރުކާރުން ހަދާ ސެންޓްރަލް ޕަވާ ސްޓޭޝަނާއެކު ކުރިއަށް އޮތް 20 އަހަރު ދުވަހަށް އެ ސިޓީގެ ކަރަންޓުގެ މައްސަލަ ހައްލުވެގެންދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އައްޑޫގެ ގުޅިފައިވާ ރަށްތަކުގެ ކަރަންޓުގެ ހާލަތު ރަނގަޅުކުރަން ފެނަކަ ކޯޕަރޭޝަނުން 18 އޭޕްރިލް 2024 ގައި ޗައިނާގެ ޑޮންފަންގް އިލެކްޓްރިކް ކޯޕަރޭޝަންއާ ހަވާލުކުރި އެވެ.

ފެނަކަ އިން އޭރު ބުނި ގޮތުގައި ދޮޅު އަހަރު ތެރޭގައި ނިންމާ ގޮތަށް ސޮއިކުރި އެ މަޝްރޫއަކީ ޑޮންފަންގް އިލެކްޓްރިކްއިން ފައިނޭންސްކުރާ މަޝްރޫއުއެކެވެ. އެ ކުންފުންޏަށް ފެނަކައިން ފައިސާ ދައްކައި ނިންމަން ޖެހެނީ 12 އަހަރު ދުވަސް ފަހުންނެވެ.

ނަމަވެސް ޑޮންފަން ކުންފުންޏާ ހަވާލުކުރި މަޝްރޫއު ކުރިއަށް ނުގެންދާތީ އެ އެއްބަސްވުން މިހާރު ބާތިލުކޮށް، ފެނަކަ އިން މިއަދު ވަނީ އެ މަޝްރޫއު ދުބާއީގެ ޑެފިނިޓް ސޮލިއުޝަންސް ނަމަކަށް ކިޔާ ކުންފުންޏަކާ ހަވާލުކޮށްފަ އެވެ. ފެނަކައިން ބުނާ ގޮތުން އެ މަޝްރޫއު ހަވާލުކުރީ 31 މިލިއަން ޑޮލަރަށެވެ. އެ މަޝްރޫއުއަށް ފައިސާ ދައްކަންޖެހޭ ގޮތެއް ހާމަކޮށްފައެއް ނުވެ އެވެ.

އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ ”ދަ ގްރޭޓާ އައްޑޫ“ ކެމްޕެއިން އިފްތިތާހުކުރުމަށް ހެންވޭރު އާޓިފިޝަލް ބީޗުގައި ރޭ ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ މިދިޔަ އެމްޑީޕީ ސަރުކާރުގައި މަޖިލީހުގެ ސުޕަ މެޖޯރިޓީ އޮތް ނަމަވެސް އައްޑޫގެ ކަރަންޓުގެ މައްސަލަ ހައްލުކުރެވިފައި ނުވާ ކަމަށެވެ. ނަމަވެސް މިއަދު ސޮއިކުރި އެއްބަސްވުމުގެ ސަބަބުން ކުރިއަށް އޮތް 20 އަހަރަށް އައްޑޫގެ ކަރަންޓުގެ މައްސަލަ ހައްލުވާނެ ވިދާޅުވި އެވެ.