ތިން މަހުގެ ކުއްޖެއް ފަދަ އިގުތިސާދެއް އޮތް މިގައުމު ހިންގޭނީ ރައީސް މުއިއްޒު ފަދަ ވެރިއަކަށް: ފަލާހު

ރާއްޖެއަކީ ތިން މަހުގެ ތުއްތުކުއްޖެއް ފަދަ އިގުތިސާދެއް އޮތް ގައުމެއް ކަމަށާއި މިފަދަ ގައުމެއް ރައީސް ޑރ. މުހައްމަދު މުއިއްޒު ފަދަ ވެރިއަކަށް ނޫނީ ނުހިންގޭނެ ކަމަށް ޕީއެންސީގެ ޕާލިމަންޓްރީ ގުރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.

އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ ”ދަ ގްރޭޓާ އައްޑޫ“ ކެމްޕެއިން ލޯންޗުކުރުމަށް ހެންވޭރު އާޓިފިޝަލް ބީޗުގައި ރޭ ބޭއްވި ރަސްމިއްޔާތުގައި ފަލާހު އެހެން ވިދާޅުވީ, ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށް ބާއްވަންޖެހޭ ސަބަބުތައް ފާހަގަކުރައްވަމުންނެވެ.

އޭނާ ވިދާޅުވީ, ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށް ބޭއްވުމަކީ ސިޔާސީ ހުރިހާ ފަރާތްތަކުން އިއްތިފާގުވެފައިވާ ކަމެއް ކަމަށާއި އެކަމުން ވަރަށް ގިނަ މަންފާތަކެއްވެސް ލިބޭ ކަމަށެވެ. އޭގެ ތެރެއިން އެއް ކަމަކީ ގައުމަށް ހަމަޖެހުން ލިބުން ކަމަށް ފަލާހު ވިދާޅުވި އެވެ.

”އަޅުގަނޑުމެންނަކީ ފަތުރުވެރިކަމަށް ބަރޯސާވެފައި އޮތް ގައުމެއް. ވަރަށް ނާޒުކު އިގުތިސާދެއްގެ މަތީގައި އޮތް ގައުމެއް. ހަގީގަތުގައި އިހުލާސްތެރި އަޅުގަނޑުމެންގެ ރައީސުލްޖުމްހޫރިއްޔާ ފަދަ ވެރިއަކަށް ނޫނިއްޔާ މިކަހަލަ ގައުމެއްގެ ހުންގާނުގައި ހުންނަވާކަށް ނުވާނެ. އެއީ މިއީ ތިންމަހުގެ ކުއްޖެއް ފަދަ އިގުތިސާދެއް އޮންނަ ގައުމެއް. ބަޔަކު ކުރާ ކަމެއްގެ ސަބަބުން ވެއްޓި ބޯފަޅައިގެން ހިނގައިދާނެ,“ ފަލާހު ވިދާޅުވި އެވެ.