ބޮޑެތި މުބާރާތްތަކުގައި ޖެހިޖެހިގެން 10 މެޗުގައި ގޯލު ނުޖެހި ދިއުމުން ޓީމުގައި ހިމެނުމާ މެދު ސުވާލު އުފެއްދި ފާޑުކިޔުންތެރިންނަށް އުމުރުން 41 އަހަރުގެ ޕޯޗުގަލް ތަރި ކްރިސްޓިއާނޯ ރޮނާލްޑޯ ވަރުގަދަ ރައްދެއް ދީފިއެވެ.
ރޮނާލްޑޯ ދެ ގޯލު ޖަހައި ހަ ވޯލްޑް ކަޕެއްގައި ގޯލު ޖެހި ފުރަތަމަ ކުޅުންތެރިޔާގެ ރެކޯޑާއެކު، ޕޯޗުގަލުން ވަނީ ”ގްރޫޕް ކޭ“ ގެ މެޗުގައި އުޒްބެކިސްތާން 5-0 އިން ރޭ ބަލިކޮށްފިއެވެ.
މެޗަށްފަހު ވާހަކަދައްކަމުން ރޮނާލްޑޯ ތަކުރާރުކޮށް ބުނީ މިއީ އޭނާގެ އެނބުރި އައުން ކަމަށާއި ނަމަވެސް އެންމެ މުހިންމީ ޓީމުގެ ކުރިއެރުން ކަމަށް އޭނާ ބުންޏެވެ. އަދި ޓީމުން ވަރަށް ރަނގަޅަށް ކުޅެ ބޮޑެތި ކުރިއެރުންތައް ހޯދާފައިވާ ކަމަށް އޭނާ ބުންޏެވެ.
ރޮނާލްޑޯ ފުރަތަމަ ގޯލު ޖެހީ ހަވަނަ މިނެޓުގައި ޖޮއާއޮ ކެންސެލޯގެ ބޯޅަ، ގޯލުގެ ތެރެއަށް ފޮނުވާލައިގެންނެވެ. އަދި ދެވަނަ ގޯލު ޖެހީ ބްރޫނޯ ފެނާންޑޭސްގެ ބޯޅަ ރީތިކޮށް ގޯލުގެ ތެރެއަށް ފޮނުވާލައިގެންނެވެ. މި ދެ ގޯލާއެކު ރޮނާލްޑޯގެ ވޯލްޑް ކަޕް ގޯލުގެ ޖުމުލަ 10 އަށް އަރައި، ޕޯޗުގަލްގެ ލެޖެންޑް ޔޫސީބިޔޯ ފަހަނައަޅައި ވޯލްޑް ކަޕްގައި އެ ގައުމުން އެންމެ ގިނަ ގޯލު ޖެހި ކުޅުންތެރިޔާއަށް ވެފައިވެއެވެ.
ރޮނާލްޑޯގެ ދެވަނަ ގޯލުގެ ކުރިން ޕޯޗުގަލްގެ ފުލްބެކް ނޫނޯ މެންޑޭޒް ވަނީ ހިތްގައިމު ހިލޭ ޖެހުމަކުން ގޯލު ޖަހައިފައެވެ. އުޒްބެކިސްތާންގެ ކީޕަރު އަބްދުއްވަހީދު ނަމަތޯވް ބައިކޮޅަށް ގޯލެއް ވަން އިރު، ޕޯޗުގަލް ފަސްވަނަ ގޯލަކީ ރަފައެލް ލެއާއޯ ޖެހި ގޯލެކެވެ.
މެޗަށްފަހު ޕޯޗުގަލްގެ ކޯޗު ރޮބެރްޓޯ މާޓިނޭޒް ބުނީ ކޮންގޯއާ 1-1 އިން އެއްވަރުވި ފުރަތަމަ މެޗަށް ފަހު ޓީމުން ދެއްކީ ފުރިހަމަ ޖަވާބެއް ކަމަށެވެ. ”މިއީ ޑްރެސިންގް ރޫމުގައި އަހަރެމެން ދެއްކި ވާހަކައިގެ ޖަވާބު. މުބާރާތުގައި ކުރިއެރުމަށް މިކަހަލަ މެޗެއް ބައެއް ފަހަރު ބޭނުންވޭ. މިއަދު ފެނުނީ ހަމަ އެ ރޫހާއި ހިތްވަރު ހުރި ނަމަވެސް މާ ބޮޑު ފުރިހަމަކަމެއް ދެއްކި ޓީމެއް،“ މާޓިނޭޒް ބުނެފައިވެއެވެ.
ދެ މެޗުން ހަތަރު ޕޮއިންޓް ހޯދާފައިވާ ޕޯޗުގަލް ”ގްރޫޕް ކޭ“ ގެ ފަހު މެޗުގައި ނުކުންނާނީ ކޮލަމްބިއާއާ ދެކޮޅަށެވެ. އެއްވެސް ޕޮއިންޓެއް ނުލިބި ކެޓުމުގެ ބިރު ހީވެފައިވާ އުޒްބެކިސްތާން ފަހު މެޗުގައި ބައްދަލުކުރާނީ ކޮންގޯއާއެވެ.
