ފަލަސްތީން ޓެލެތޯނަށް ލިބުނު 19 މިލިއަން ރުފިޔާ އަންރުއާގެ އެކައުންޓަށް ޖަމާކޮށްފި

ފަލަސްތީނު ރައްޔިތުންނަށް އެހީވުމަށްޓަކައި ރާއްޖެއިން ކުރިއަށް ގެންދިޔަ ހާއްސަ ޓެލެތޯން ’ފަލަސްތީނާއެކު ދިވެހިން‘ އަށް ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ)ގެ އެކައުންޓަށް ޖަމާކޮށްފި އެވެ.

ޕީއެސްއެމް އިން އިސްނަގައިގެން ރާއްޖޭގެ ބައެއް މީޑިއާތަކާ ގުޅިގެން ހުސްވި ޖޫން މަހުގެ 12 ވަނަ ދުވަހު ކުރިއަށް ގެންދިޔަ އެ ޓެލެތޯނަށް 19 މިލިއަން ރުފިޔާ ލިބުނެވެ. އަދި އެ ފައިސާ ފަލަސްތީނުގެ ރައްޔިތުންނާ ހަވާލުކުރުމަށް ޖުލައި ތިންވަނަ ދުވަހު ފޮރިން މިނިސްޓްރީއާ ވަނީ ހަވާލުކޮށްފަ އެވެ.

އެ ފައިސާ އަދިވެސް އަންރުއާއަށް ފޮނުވާފައި ނުވާ ކަމަށް ބުނެ މީޑިއާއަކުން ހަބަރެއް ޖެހި ފަހުން، ފޮރިން މިނިސްޓްރީގެ އޮފިޝަލަކު މިއަދު ވަނީ އެ ފައިސާ ޖަމާކޮށްފައިވާ ކަމަށް މީޑިއާތަކަށް ބުނެފަ އެވެ.

މި ނޫހަށް އެނގިފައިވާ ގޮތުގައި އެ ފައިސާ އަންރުއާ އަށް ފޮނުވީ އިއްޔެ ހެނދުނެވެ. އަދި ފައިސާ ފޮނުވީ މިނިސްޓްރީ އާއި މަރުކަޒީ ބޭންކު، އެމްއެމްއޭ މެދުވެރިކޮށް ސީދާ އަންރުއާގެ އެކައުންޓަށް ޑޮލަރުން ކަމަށްވެސް އެނގިފައިވެ އެވެ.