ވޯލްޑް ކަޕް ސެމީ ފައިނަލުގައި ބުދަ ދުވަހު އާޖެންޓީނާއިން އިންގްލެންޑާ ކުރިމަތިލާ އިރު، މިއީ ލިއޮނަލް މެސީގެ ކެރިއަރުގައި ފުރަތަމަ ފަހަރަށް އިންގްލެންޑާ ދެކޮޅަށް ކުޅޭ މެޗަށް ވާނެއެވެ.
ވިހި އަހަރަށްވުރެ ދިގު ފުޓްބޯޅަ ކެރިއަރުގައި ބްރެޒިލް، ފްރާންސް، ޖަރުމަން، އިޓަލީ، ސްޕެއިން އަދި އުރުގުއާއީ ފަދަ ވޯލްޑް ކަޕް ކާމިޔާބުކޮށްފައިވާ ހުރިހާ ގައުމަކާ ދެކޮޅަށް ކުޅެފައިވީ ނަމަވެސް، 39 އަހަރުގެ މެސީ، އިންގްލެންޑާ ދެކޮޅަށް މީގެ ކުރިން ދުވަހަކުވެސް ކުޅެފައެއް ނުވެއެވެ. އެންމެ ގާތުން ދިމާވެފައިވަނީ 2005 ވަނަ އަހަރުގެ ނޮވެމްބަރު މަހު ޖެނީވާގައި ކުޅުނު އެކުވެރިކަމުގެ މެޗެކެވެ. އެއީ މި ދެ ޓީމު އެންމެ ފަހުން ބައްދަލުކުރި މެޗެވެ.
އެ މެޗުގައި އާޖެންޓީނާ 3-2 އިން ބަލިވި އިރު، އިންގްލެންޑް މޮޅުވީ ވޭން ރޫނީގެ ގޯލަކާއި މައިކަލް އޯވަންގެ ދެ ގޯލާއެކުއެވެ. އާޖެންޓީނާގެ ގޯލުތައް ކާމިޔާބުކޮށްދިނީ ހެނާން ކްރެސްޕޯ އަދި ވޯލްޓާ ސެމުއެލްއެވެ. ނަމަވެސް މެސީ އެ މެޗުގައި ނުކުޅެއެވެ. ސަބަބަކީ ކުރިން ހަންގޭރީއާ ދެކޮޅަށް ކުޅުނު ބައިނަލްއަގުވާމީ ފުރަތަމަ މެޗުގައި ރަތްކާޑު ދެއްކުމުންނެވެ.
އާޖެންޓީނާ ސެމީ ފައިނަލަށް ދަތުރުކުރީ ސްވިޒަލޭންޑާ ދެކޮޅަށް އިތުރު ވަގުތުގައި 3-1 އިން މޮޅުވެގެންނެވެ. އެ މޮޅަށްފަހު ނޫސްވެރިންނާ ވާހަކަދައްކަމުން މެސީ ބުނީ، ”ހާއްސަ ސަބަބަކީ އެއީ ބޮޑު ބާރެއް، ވަރުގަދަ ޓީމެއް، އަދި މިކަހަލަ ޓީމަކާ ދެކޮޅަށް، މިކަހަލަ މެޗެއް ކުޅުމަކީ އަބަދުވެސް ރަނގަޅު ކަމެއް“ ކަމަށެވެ.
”އަހަރެމެން އަރާމުކުރަން ޖެހޭ، ސަބަބަކީ ވަރަށް ބުރަކޮށް ކުޅެފައިވާތީ، ޓީމުގެ ހުރިހާ ކުޅުންތެރިންނަށްވެސް އެކަން އިހުސާސްވޭ. ވީހާވެސް ރަނގަޅު ހާލަތެއްގައި ދާން ބޭނުންވަނީ، ކުރިން ކުރަމުން އައި ގޮތަށް ވާދަކުރުމަށް،“ އޭނާ ބުންޏެވެ.
ސްވިޒަލޭންޑާ ދެކޮޅު މެޗުގައި އެލެކްސިސް މެކް އެލިސްޓާގެ ފުރަތަމަ ގޯލަށް މެސީ އެސިސްޓެއް ދިން އިރު، 2022 ވަނަ އަހަރު ގަތަރު ވޯލްޑް ކަޕުގައި ޕޮލެންޑާ ދެކޮޅަށް 2-0 އިން މޮޅުވި ގްރޫޕް ސްޓޭޖު މެޗަށްފަހު، މެސީ ގޯލެއް ނުޖަހާ ކުޅުނު ފުރަތަމަ ވޯލްޑް ކަޕް މެޗަކީ މިއީއެވެ. މީގެ ކުރިން ކާމިޔާބުކަމާއެކު ތިން ފަހަރު ނޮކްއައުޓް މެޗުތަކުން އާޖެންޓީނާ ސަލާމަތްވެފައިވެއެވެ. ގަދަ 32 ގައި ކޭޕް ވާޑް ބަލިކުރީ އިތުރު ވަގުތުގައި 3-2 އިންނެވެ. ގަދަ 16 ގައި މިސްރު 2-0 އިން ކުރި ހޯދާފައި އޮއްވައި، ފަހު 11 މިނެޓު ތެރޭ ފަހަތުން އަރައި 3-2 އިން މޮޅުވެފައިވެއެވެ.
ރާއްޖޭގަޑިން ބުދަ ދުވަހުގެ ރޭ 12:00 ގައި އާޖެންޓީނާ އާއި އިންގްލެންޑް ކުޅޭ މެޗަށް ނުކުންނަ އިރު، ޖެހިޖެހިގެން ދެވަނަ ވޯލްޑް ކަޕް ތައްޓެއް ހޯދުމަށް އެ މެޗަކީ މުހިންމު މެޗަކަށް ވާނެއެވެ. އަދި އިންގްލެންޑް މަސައްކަތްކުރަނީ 1966 ގެ ވޯލްޑް ކަޕް ތައްޓަށްފަހު ބައިނަލްއަގުވާމީ ބޮޑު މުބާރާތެއްގެ ތަށި ހޯދުމަށެވެ.
