އެމެރިކާއިން އަލުން ހަމަލާ ދޭން ފަށައިފިނަމަ، އެމެރިކާއަށް ”ނަރަކައިގެ ވާރޭއެއް އޮއްސާލާނެ“ ކަމަށް ބުނެ އެމެރިކާއަށް އީރާނުގެ ފޮރިން މިނިސްޓަރު އައްބާސް އަރަގްޗީ އިންޒާރު ދެއްވައިފި އެވެ.
މިއީ ދެ ގައުމުގެ ދެމެދުގައި ހިނގަމުންދާ އަށް މަސް ދުވަސްވީ ހަނގުރާމަ ނިމުމަކަށް ގެނައުމަށްޓަކައި ވޮޝިންޓަނަށް ދިން އެންމެ ފަހުގެ އިންޒާރެކެވެ.
”އަހަރެމެން ހުށަހެޅި ދެ ދުވަހުގެ ހުށަހެޅުން އަދިވެސް އެބަ އޮތް: ހުރިހާ ފަރާތަކުން ވެސް ހަނގުރާމަ ހުއްޓާލުން ހިމެނޭހެން، ޝަރުތުތައް ފުރިހަމަކުރޭ، އޭރުން އޭގެ ނަތީޖާ ފެންނާނެ. ނޫންނަމަ، ހަނގުރާމަ އިހުތިޔާރުކުރޭ، އަހަރެމެންގެ ހުށިޔާރު، ހަނގުރާމައިގެ ތަޖުރިބާ ލިބިފައިވާ ހަނގުރާމަވެރިން ނަރަކައިގެ ވާރޭއެއް އޮއްސާލާތަން ދެކެން ތިބޭ،“ އަރަގްޗީ ވިދާޅުވި އެވެ.
އަރަގްޗީ މިގޮތަށް އިންޒާރު ދެއްވާފައި މިވަނީ, އީރާނުގެ ނިއުކްލިއާ ޕްރޮގްރާމާއި ހޮރްމޫޒް ކަނޑުއޮޅި އަލުން ހުޅުވާލުމާ ގުޅޭގޮތުން ކުރެވޭ މަޝްވަރާތައް ކުރިއަށްދާނަމަ، އީރާނަށް އަލުން ހަމަލާ ދިނުމަކީ ”ވަރަށް ނާދިރު“ ކަމެއް އެމެރިކާގެ ރައީސް ޑޮނަލްޑް ޓްރަމްޕް ބުނެފައި ވަނިކޮށެވެ.
ނަމަވެސް ޓްރަމްޕް ފަހުން ވަނީ މެދުއިރުމަތީގައި އެމެރިކާގެ މަތިންދާބޯޓު އުފުލާ ތިން މަނަވަރު ”ފުރިހަމައަށް ހަތިޔާރާއެކު ތައްޔާރަށް“ އެބައޮތް ކަމަށާއި ބޭނުންވެއްޖެ ހިނދެއްގައި ހަމަލާތައް ކުރިއަށް ގެންގޮސް, އެންމެ ގަޑިއިރެއްގެ ތެރޭގައި އީރާނުގެ 38 ބަނދަރެއް ބިމާ ހަމަކޮށްލެވިދާނެކަމުގެ އިންޒާރު ދީފަ އެވެ.
