އިނގިރޭސި ޕްރިމިއާ ލީގު ކާމިޔާބުކުރި ސީޒަނަށްފަހު، ދެވަނަ ސީޒަނުގައި ލިވަޕޫލް ފަސްވަނައަށް ވެއްޓުމުން، ކްލަބުން އާނޭ ސްލޮޓް މަގާމުން ވަކިކޮށްފިއެވެ.
ފޭޔަނޫޑްގެ ކުރީގެ ކޯޗު ސްލޮޓް، ޔާގެން ކްލޮޕްގެ ބަދަލުގައި 2024 ވަނަ އަހަރު ލިވަޕޫލާ ހަވާލުވެ، ފުރަތަމަ ސީޒަނުގައި ލީގު ކާމިޔާބުކޮށް ގިނަ ބައެއްގެ ތައުރީފު ހޯދިއެވެ. ނަމަވެސް، އޭނާގެ ދެވަނަ ސީޒަނުގައި ޓީމުގެ ނަތީޖާތައް ދަށްވެ، ޗެމްޕިއަންސް ލީގަށް ކޮލިފައިވުމަށް ބޮޑު މަސައްކަތެއް ކުރަން ޖެހުނު އިރު، އެއްވެސް ޑޮމެސްޓިކް ތައްޓެއް ކާމިޔާބު ނުކުރެވުމަކީ ޗެމްޕިއަނުންގެ ހައިސިއްޔަތުން ލިބުނު ބޮޑު ނާކާމިޔާބީއެކެވެ.
ލިވަޕޫލުން މިއަދު ނެރުނު ބަޔާނެއްގައި ބުނެފައިވަނީ މިއީ ވަރަށް އުނދަގޫ ނިންމުމެއް ކަމަށެވެ. އަދި ސްލޮޓް ލިވަޕޫލަށް ކޮށްދިން ހިދުމަތްތަކަކީ ވަރަށް މުހިންމު އަދި ކާމިޔާބު ހިދުމަތްތަކެއް ކަމަށާއި، ސަޕޯޓަރުންނާއި ކްލަބަށް އޭނާގެ މަސައްކަތް ވަރަށް ބޮޑަށް ފާހަގަކުރެވޭ ކަމަށް އެ ބަޔާނުގައިވެއެވެ.
ސްލޮޓްއާ ބައްދަލުވި ހިސާބުން ފެށިގެން، އޭނާއަކީ ޒިންމާ ނަގަން ފަސްނުޖެހޭ އަދި ޒިންމާ އުފުލާ މީހެއްކަން ވަރަށް ރަނގަޅަށް ސާފުވި ކަމަށާއި، ޕްރިމިއާ ލީގުގެ ތަށި ހޯދުމާއި، މިދިޔަ ސީޒަނުގައި ކުރިމަތިވި ގޮންޖެހުންތަކާ އޭނާ ކުރިމަތިލި ގޮތުން އެކަން ސާބިތުވެފައިވާ ކަމަށް ކްލަބުން ބުނެފައިވެއެވެ. ނަމަވެސް، ކްލަބު ކުރިއަށް ގެންދިއުމަށްޓަކައި ބަދަލުތަކެއް ގެންނަން މަޖުބޫރުވެފައިވާ ކަމަށް ވެސް ކްލަބުން ވަނީ ފާހަގަކޮށްފައެވެ.
ލިވަޕޫލުން މިހާރު ވަނީ އާ ކޯޗަކު ހޯދުމުގެ މަސައްކަތް ފަށައިފައެވެ. މީޑިއާތަކުގައި ރިޕޯޓުކުރާ ގޮތުގައި، ބޯންމަތު ލީގުގެ ހަވަނަ މަގާމަށް ގެންގޮސް، ފުރަތަމަ ފަހަރަށް ޔުރޮޕާ ލީގަށް ކޮލިފައިކޮށްދިން އެންޑޯނީ އިރައޯލާ ލިވަޕޫލްގެ ކޯޗުކަމުގެ މަގާމަށް އަތުވެދާނެ ކަމަށް ބެލެވެއެވެ.
މި ސީޒަނުގައި ޓީމު 19 މެޗުން ބަލިވުމާއި، ކުޅުންތެރިންގެ މެދުގައި ހިތްހަމަނުޖެހުންތަކެއް ހުރުމުން ސަޕޯޓަރުންގެ ފާޑުކިޔުންތައް ސްލޮޓަށް ވަނީ އަމާޒުވެފައެވެ. ވަކިވެގެންދާ މުހައްމަދު ސަލާހް ފަދަ ކުޅުންތެރިން ވެސް މިކަމާ މެދު ނުރުހުން ފާޅުކޮށްފައިވެއެވެ.
ލިވަޕޫލުން މިދިޔަ އަހަރު ޓީމު ވަރުގަދަ ކުރުމަށް 570 މިލިއަން ޑޮލަރު ހަރަދުކުރި ނަމަވެސް، ފްލޮރިއަން ވިޓްޒް، ޖެރެމީ ފްރިމްޕޮންގް އަދި އަލެކްސަންޑާ އިސާކް ފަދަ ކުޅުންތެރިންގެ ފަރާތުން އުންމީދުކުރި ފެންވަރުގެ ކުޅުމެއް ފެނިފައެއް ނުވެއެވެ. މީގެ އިތުރުން، މިދިޔަ ސީޒަނުގެ ހޫނު މޫސުމުގައި ޕޯޗުގަލްގެ ފޯވަޑް ޑިއޯގޯ ޖޮޓާ މަރުވުމަކީ ވެސް ކްލަބަށް ކުރިމަތިވި ހިތާމަވެރި އަދި އުނދަގޫތަކެއް ކުރިމަތިވި ކަމެކެވެ.
