ވޮޝިންޓަން ޕޯސްޓުގެ ތަހުގީގުގައި އެއްވެސް ހަގީގަތެއް ނެތް: ހަލީލް

އިންޑިއާގެ ޖާސޫސީ އިދާރާ ރޯގެ އެހީގައި ރާއްޖޭގެ ވެރިކަމުން ރައީސް ޑރ. މުހައްމަދު މުއިއްޒު ވައްޓާލަން އުޅުނު ކަމަށް ބުނެ ވޮޝިންޓަންޕޯސްޓުން ޝާއިއުކުރި ރިޕޯޓުގައި އެއްވެސް ހަގީގަތެއް ނެތް ކަމަށް ފޮރިން މިނިސްޓަރު އަބްދުالله ހަލީލު ވިދާޅުވެއްޖެ އެވެ.

އިންޑިއާގެ ވިއޯން ނޫހަށް ދެއްވި އިންޓަވިއެއްގައި ހަލީލު ވިދާޅުވީ ވޮޝިންޓަންޕޯސްޓުގެ ރިޕޯޓާ ގުޅިގެން ދެއްވަން އޮތީ ވަރަށް ކުރު ޖަވާބެއް ކަމަށެވެ.

“އެކަމަށް ވަރަށް ކުރު ޖަވާބެއް އެއީ މުޅިން ވެސް ހަގީގަތާ ހިލާފު، އަސްލެއް ނެތް ވާހަކަތަކެއް. އެކަމުގައި އެއްވެސް ހަގީގަތެއް ނެތް.“ ހަލީލު ވިދާޅުވި އެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީގައި ކޮންމެ ހަފުތާއަކު ބާއްވާ ނޫސްވެރިންގެ ބައްދަލުވުމުގައި އެ މިނިސްޓްރީގެ ތަރުޖަމާނު ރަންދީރު ޖައިސްވާލް ވެސް ވަނީ ރާއްޖޭގެ ވެރިކަން ވައްޓާލަން އުޅުނު ކަމުގެ ތުހުމަތު ދޮގު ކުރައްވައިފަ އެވެ.

ވޮޝިންޓަން ޕޯސްޓުގެ ރިޕޯޓުގައި ބުނެފައިވަނީ ރާއްޖޭގެ އިދިކޮޅު ފަރާތްތަކާއެދު ރައީސް މުއިއްޒު ވެރިކަމުން ބޭލުމުގެ މަޝްވަރާކޮށްފައިވަނީ ރާއްޖެއާއި އިންޑިއާގެ ގުޅުން އެންމެ ގޯސްވި، މި އަހަރުގެ ޖެނުއަރީ މަހުގެ ތެރޭގައި ކަމަށެވެ.

އެ މަޝްވަރާގެ ތެރެއިން ޕީއެންސީ މެމްބަރުން ހިމެނޭ ގޮތަށް ރައްޔިތުންގެ މަޖިލީހުގެ 40 މެމްބަރަކަށް ރިޝްވަތު ދީގެން، ރައީސް މުއިއްޒުގެ މައްޗަށް އިތުބާރު ނެތް ކަމަށް ފާސްކުރަން ނިންމި ކަމަށް ވޮޝިންޓަން ޕޯސްޓުން ބުނެފައިވެ އެވެ.

މެންބަރުންގެ އިތުރުން ރައީސް މުއިއްޒުގެ ވެރިކަން ވައްޓާލުމަަށް ފުލުހުންނާއި ސިފައިންގެ އެހީތެރިކަން ހޯދުމާއި ގުޅޭގޮތުންވެސް ރޯއިން ވަނީ އެމްޑީޕީއާ މަޝްވަރާކޮށްފައި ކަމަށް ވޮޝިންޓަން ޕޯސްޓުން ބުނެފައިވެ އެވެ. ދިވެހި ފުލުހުންނާއި ދިވެހި ސިފައިންގެ 10 އިސް އޮފިސަރުންނާއި ރާއްޖޭގައި ހަރަކާތްތެރިވާ ބާރުގަދަ ތިން ގޭންގަކަށް ފައިސާ ދޭން ނިންމި ކަމަށް ބުނެފައިވެ އެވެ.

ރައީސްގެ ވެރިކަން ވައްޓާލުމުގެ އެކަންކަން ރޯއަށް ހުށަހެޅީ އިދިކޮޅު ފަރާތްތަކުން ކަމަށާއި އެކަމަށް ބޭނުންވާ 92.5 މިލިއަން ރުފިޔާ ހޯދަން ވެސް ނިންމައިފައިވަނީ އިންޑިއާއިން ކަމަށް ވޮޝިންޓަން ޕޯސްޓުން ބުންޏެވެ.

ނަމަވެސް، ސިއްރިއްޔާތުގައި އެތައް މަހަކަށް ދިގުދެމިގެންދިޔަ ރޭވުންތަކަށް އަމަލީ ސިފައެއް ނުޖެއްސުނީ، ރައީސް މުއިއްޒު މަގާމުން ދުރުކުރަން އެކަށީގެންވާ އަދަދަށް މެމްބަރުން ނުލިބުމުން ކަމަށް ބުނެފައިވެ އެވެ.

އެ ރޭވުންތަކުގައި އިންޑިއާގެ ފަރާތުން އިސްކޮށް މަސައްކަތް ކުރީ، ޝިރީޝް ތޮރާތު ނަމަކަށް ކިޔާ ކުރީގެ ފުލުހަކާއި އިންޑިއާގެ ވެރިކަންކުރާ ޕާޓީ، ބީޖޭޕީގެ ކުރީގެ ތަރުޖަމާނެއް ކަމަށްވާ ސަވިއޯ ރޮޑްރީގްސް އެވެ. ތޮރާތަކީ، ވޮޝިންގްޓަންޕޯސްޓުން ބުނި ގޮތުގައި، ކުރީގެ ރައީސް މުހައްމަދު ނަޝީދުގެ ވެރިކަމުގައި، ދީނީ ހަރުކަށި ފިކުރާ ދެކޮޅަށް އެޑްވައިޒަރެއްގެ ގޮތުގައި މަސައްކަތް ކުރި މީހެކެވެ.

ވޮޝިންގްޓަންޕޯސްޓުން ބުނިގޮތުގައި، ރައީސް މުއިއްޒުގެ ގާތް މީހަކު ވަނީ، ތޮރާތު އާއި އިންޑިއާގެ ރޯ އޭޖެންޓުންނާ ދެމެދު ކުރި ބައެއް މުއާމަލާތްތައް އެ ނޫހާ ހިއްސާ ކޮށްފަ އެވެ. ނަމަވެސް، އެ މުއާމަލާތްތައް ހޯދި ގޮތެއް އެ މީހާ ހާމަކޮށްފައި ނުވާ ކަމަށް އެ ނޫހުން ބުންޏެވެ.