ވެހިކަލް ގެނެސްދޭނެ ކަމަށް ބުނެ، މަކަރާއި ހީލަތުން އޮޅުވާލައިގެން ގިނަ ބައެއްގެ އަތުން ފައިސާ ހޯދި މައްސަލައެއް ފުލުހުން ތަހުގީގު ކުރަން ފަށައިފި އެވެ.
ފުލުހުން މިއަދު ބުނީ، ފުލުހުންގެ އިކޮނޮމިކް ކްރައިމް ޑިޕާޓްމަންޓުން ތަހުގީގު ކުރަމުން އަންނަ މައްސަލައަކީ މެގަޓްރޯން މޮޓޯސް މޯލްޑިވްސް ވޭވް އިންޓަނޭޝަނަލް ނަމަކަށް ކިޔާ ބަޔަކާ ގުޅުންހުރި މައްސަލައެއް ކަމަށެވެ. އެއީ ގަޑި ވިއްކުމުގައި މަޝްހޫރުކަން ހޯދި މޯލްޑިވްސް ވޭވްގެ ކުންފުންޏެކެވެ.
ފުލުހުން ބުނީ، އެ ކުންފުންޏަށް ވެހިކަލް ގެނެސްދިނުމުގެ ނަމުގައި މަކަރާއި ހީލަތުން ގިނަ އަދަދެއްގެ ފައިސާ ހޯދި މައްސަލައެއް އެ އިދާރާއަށް މި މަހު ހުށަހަޅާފައިވާ ކަމަށެވެ.
އެހެންވެ އެ ކުންފުންޏަށް ވެހިކަލް ގެނައުމުގެ ގޮތުން ފައިސާ ދައްކާފައިވާ ނަމަ އިކޮނޮމިކް ކްރައިމް ޑިޕާޓްމަންޓުގެ ނަމްބަރު، 9790048 އަށް ގުޅައި ހިއްސާކޮށްދިނުމަށް އެދިފައިވެ އެވެ.
މީގެ ހަތަރު އަހަރު ކުރިން އުފެއްދި މޯލްޑިވްސް ވޭވްގެ ކުންފުންޏަކާ ގުޅޭ މަކަރާއި ހީލަތުގެ މައްސަލައެއް ފުލުހުން ބަލަމުންދާއިރު، އެ ކުންފުނީގެ ޕޭޖުން އަޕްޑޭޓް ނުކުރާތާ މިހާރު ދެ މަސް ދުވަސްވެއްޖެ އެވެ.
ކޮމެންޓް