ބޮޑު ވަފުދަކާއެކު ރައީސް ޗައިނާއަށް ފުރާވަޑައިގެންފި

ރައީސް ޑރ. މުހައްމަދު މުއިއްޒު، ޗައިނާއަށް ކުރައްވާ ރަސްމީ ދަތުރުފުޅެއްގައި މިރޭ ފުރާވަޑައިގެންފި އެވެ.

ރައީސް ޗައިނާއަށް ކުރައްވާ މި ދަތުރުފުޅަކީ އެ ގައުމުގެ ރައީސް ޝީ ޖިންޕިންގެ ދައުވަތަކަށް ކުރައްވާ ދަތުރުފުޅެކެވެ. ރައީސް އޮފީހުން ބުނެފައިވާ ގޮތުން މި ދަތުރުފުޅަކީ ހަ ދުވަހުގެ ދަތުރުފުޅެކެވެ. އެ މަނިކުފާނު އެނބުރި ރާއްޖެ ވަޑައިގަންނަވާނީ އަންނަ ހުކުރު ދުވަހު އެވެ.

މި ދަތުރުފުޅުގައި ރައީސް މުއިއްޒުގެ އަނބިކަނބަލުން އަދި ފަސްޓް ލޭޑީ ސާޖިދާ މުހައްމަދާއި ސަރުކާރުގެ ބޮޑު ވަފުދެއްވެސް ބައިވެރިވެވަޑައިގަންނަވަ އެވެ.

ރައީސް އޮފީހުގެ ސްޓްރެޓެޖިކް ކޮމިއުނިކޭޝަންސް މިނިސްޓަރު އިބްރާހިމް ހަލީލު އާންމު ކުރައްވާފައިވާ ވީޑިއޯއެއްގައި ފެންނަ ގޮތުން އެ ދަތުރުފުޅުގައި 10 އަށްވުރެ ގިނަ ބޭފުޅުންނަށް ވަޑައިގަންނަވަ އެވެ. ދަތުރުފުޅުގައި ބައިވެރިވެވަޑައިގަންނަވާ ބައެއް ބޭފުޅުންގެ މޫނެއް ނުފެނެ އެވެ.

ވީޑިއޯގައި ފެންނަ ބޭފުޅުން:

• ފިނޭންސް މިނިސްޓަރު ޑރ. މުހައްމަދު ޝަފީގު

• ފޮރިން މިނިސްޓަރު މޫސާ ޒަމީރު

• ޑިފެންސް މިނިސްޓަރު މުހައްމަދު ޣައްސާން މައުމޫން

• ފިޝަރީޒް މިނިސްޓަރު އަހުމަދު ޝިޔާމް

• ހައުސިން މިނިސްޓަރު ޑރ. އަލީ ހައިދަރު އަހުމަދު

• ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް

• ރައީސް އޮފީހުގެ ޕްރެޒިޑެންޝިއަލް އެފެއާސް މިނިސްޓަރު އަލީ އާރިފު

• ރައީސް އޮފީހުގެ މިނިސްޓަރު އާދަމް ރަމީޒު

• ރައީސް އޮފީހުގެ ސްޓްރެޓެޖިކް ކޮމިއުނިކޭޝަންސް މިނިސްޓަރު އިބްރާހިމް ހަލީލު

• ޕްރިންސިޕަލް ސެކްރެޓަރީ ޓު ދަ ޕްރެސިޑެންޓް އޮން ކޯޕަރޭޓް ޑިވެލޮޕްމަންޓް މުހައްމަދު ޝާހިދު

• އާބަންކޯގެ މެނޭޖިން ޑިރެކްޓަރު ފަޒުލް ރަޝީދު

• އެޑްވައިޒަރު ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުހައްމަދު އަލީ ޖަނާހު

• ފިނޭންސް މިނިސްޓަރުގެ އެޑްވައިޒަރު އަހުމަދު މުނައްވަރު