ދެ އަހަރަށްފަހު ޣައްޒާގެ އެންމެ ބޮޑު މިސްކިތުގައި ޖަމާއަތުގައި ނަމާދުކުރުމުގެ ފުރުސަތު ލިބިއްޖެ

ދެ އަހަރު ފަހުން ފުރަތަމަ ފަހަރަށް ފަލަސްތީނުގެ އެންމެ ބޮޑު އެއް މިސްކިތް އަދި ފަލަސްތީންގެ ޣައްޒާގެ އެންމެ ތާރީހީ މިސްކިތުގައި ޖަމާއަތުގައި ނަމާދު ކުރުމުގެ ފުރުސަތު ލިބިއްޖެ އެވެ.

ޣައްޒާގެ ރައްޔިތުން އިއްޔެ ވަނީ ސައްޔިދު އަލް ހާޝިމް މިސްކިތުގައި ޖަމާއަތުގައި ހުކުރު ނަމާދުކޮށްފަ އެވެ. މިއީ އިޒްރޭލާއި ހަމާސްއާ ދެމެދު ހަނގުރާމަ ފެށި ފަހުން އެ މިސްކިތުގައި ޖަމާއަތުގައި ހުކުރު ނަމާދުކުރި ފުރަތަމަ ފަހަރެވެ.

ޖަމާއަތުގައި ބައިވެރިވި އެކަކު އަލް ޖަޒީރާއަށް ބުނި އެ މިސްކިތުގައި ޖަމާއަތުގައި ނަމާދުކުރުމުގެ ފުރުސަތު ދެއްވި ކަމަށްޓަކައި ޝުކުރުކުރާ ކަމަށެވެ. އަދި ކުރެވެނީ އެހެން ކަހަލަ އުފާވެރި އިހުސާސެއް ކަމަށްވެސް އޭނާ ބުންޏެވެ.

އެހެން މީހަކު ބުނި ގޮތުގައި އިއްޔެ އަކީ ސައްޔިދު އަލް ހާޝިމް މިސްކިތުގެ ޖަމާއަތެއްގައި މިހާތަނަށް އެންމެ ގިނަ މީހުން ބައިވެރިވި ދުވަހެވެ.

ކީރިތި ރަސޫލާގެ މުނިކާފާފުޅު ހާޝިމް އިބްނު އަބްދުލް އަލް މަނާފް ފަސްދާނުލާފައިވަނީ މި މިސްކިތުގެ ގުއްބު އަޑީގައެވެ. އެކަލޭގެފާނު އަވަހާރަވީ ވިޔަފާރި ދަތުރެއްގައި ޣައްޒާއަށް ވަޑައިގެން އުޅުއްވަނިކޮށް ކަމަށް ތާރީހު ފޮތްތަކުން އެނގެ އެވެ.

ރިޕޯޓްތައް ބުނާ ގޮތުން, 12 ވަނަ ގަރުނުގައި މިހާރު މިސްކިތް ހުރި ސަރަހައްދުގައި މިސްކިތަކާއި ހޮސްޓެލްއެއް ހުއްޓެވެ. އަދި 19 ވަނަ ގަރުނާއި 20 ވަނަ ގަރުނު ތެރޭގައި އެ ތަނުގައި އިސްލާމީ އިލްމު ކިޔަވައިދޭ މަދަރުސާއެއްވެސް ހުރި ކަމަށްވެ އެވެ. މިހާރު ހުރި މިސްކިތަކީ 1850 ވަނަ އަހަރުގައި ބިނާކުރި މިސްކިތެކެވެ.

އިޒްރޭލާއި ހަމާސް އިން ޣައްޒާގައި ހަމަލާތައް ހުއްޓާލަން އެއްބަސްވީ މީގެ ފަސް ދުވަސް ކުރިންނެވެ.