ވީބީ ހަސަންގެ ކެންޑިޑެންސީ ސުޕްރީމް ކޯޓުން ބާތިލުކޮށްފި

އަންނަ އޭޕްރިލް މަހު ބާއްވަން ނިންމާފައިވާ އިންތިހާބުގައި މެދު ހެންވޭރު ދާއިރާއަށް ވާދަކުރައްވާ ހަސަން ޝިޔާމް (ވީބީ ހަސަން) ދައްކަންޖެހޭ ސާބިތު ދަރަންޏެއް އޮތް ކަމަށް ކަނޑައަޅައި، އޭނާއަށް މަޖިލިސް އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން ހުކުމްކޮށްފި އެވެ.

އެ މައްސަލަ ހުށަހަޅާފައިވަނީ 20 ވަނަ ރައްޔިތުންގެ މަޖިލީހުގެ މެދު ހެންވޭރު ދާއިރާގެ ގޮނޑިއަށް ހަސަންއާ ވާދަކުރައްވާ އެ ދާއިރާގެ މިހާރުގެ ކެނޑިޑޭޓް އަލީ އާޒިމްގެ ކޮއްކޮ، ހ. ކްއީން، އިލްޔާސް އަހުމަދެވެ.

އޭނާ ހުށަހެޅި މައްސަލާފައި ތުހުމަތުކޮށްފައިވަނީ ހަސަންގެ މައްޗަށް ސާބިތު ދަރަންޏެއް އޮތް ކަމަށް ޝަރީއަތަށް ސާބިތުވެފައިވާއިރު ހުކުމާ އެއްގޮތަށް އޭނާ ދަރަނި އަދާކުރަމުން ނުދެ އެވެ.

އެއީ ރައްޔިތުންގެ މަޖިލީހުގެ އިންތިހާބުގެ ގާނޫނާއި ރައްޔިތުުންގެ މަޖިލީހުގެ ގަވައިދުގައި، ކެންޑިޑޭޓެއްގެ ކިބައިގައި ހުންނަން ޖެހޭނެ ކަމަށް ކަނޑައަޅާފައިވާ ޝަރުތު، އޭނާގެ ކިބައިގައި ފުރިހަމަ ނުވާނެ ސަބަބެއް ކަމަށް ދައުވާގައިވެ އެވެ.

އެހެން އެކަން އޮތުމުން ހަސަންގެ ކެންޑިޑެސީ ބާތިލުކޮށްދޭން އެދިފައިވެ އެވެ.

ހަސަންގެ ކެންޑިޑެސީ ބާތިލު ކުރަން ހުކުމް ކުރެއްވީ ސުޕްރީމް ކޯޓުން އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުންނެވެ. އެއީ ރިޔާސާތުގައި އިންނެވި ފަނޑިޔާރު ޑރ. މުހައްމަދު އިބްރާހީމް، ފަނޑިޔާރު ހުސްނުއްސުއޫދު، އަދި ފަނޑިޔާރު އައިޝާ ޝުޖޫން އެވެ.