ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު, ޑރ. މުހައްމަދު ޒާހިރު ހުސެއިންއަށް އަރުވައިފި

ރާއްޖޭގެ ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު, ނިޝާން އިއްޒުއްދީނުގެ އިއްޒަތުގެ ވެރިޔާ އަދި ރާއްޖޭގެ އިސްލާމީ ޔުނިވާސިޓީގެ ޗާންސެލަރުގެ މަގާމުގައި ހުންނެވި ޑރ. މުހައްމަދު ޒާހިރު ހުސެއިން އަށް އަރުވައިފި އެވެ.

މި ޝަރަފު ޑރ. ޒާހިރަށް އެރުވީ މިރޭ ދަރުބާރުގޭގައި ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒެވެ.

މި ޝަރަފު، ޒާހިރަށް އެރުވުމަށް ރައީސް ކަނޑައެޅުއްވީ، ރާއްޖޭގެ ތައުލީމީ ތަރައްގީއަށާއި ރާއްޖޭގައި ތައުލީމު ފުޅާކުރެއްވުމަށާއި ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރުވުމަށް އިހުލާސްތެރިކަމާއެކުގައި ގިނަގުނަ ހިދުމަތްތަކެއް ކޮށްދެއްވާފައިވާތީ، އެކަމުގެ އަގުވަޒަންކުރެއްވުމުގެ ގޮތުންނެވެ.

ޑރ. ޒާހިރު، މިސްރުގެ އަލްއަޒްހަރު ޔުނިވާސިޓީ އިން މަތީ ތައުލީމު ފުރިހަމަ ކުރެއްވުމަށްފަހު ރާއްޖެއަށް ވަޑައިގެން، އެންމެ ފުރަތަމަ ހިދުމަތް ކުރެއްވީ އަމީނިއްޔާ ސްކޫލުގެ އިސްލާމް ޓީޗަރެއްގެ ގޮތުގައެވެ. އެއީ 26 ނޮވެމްބަރު 1970 ގައެވެ.

އަމީނިއްޔާ ސްކޫލުގައި ހިދުމަތް ކުރައްވަމުން ގެންދަވަނިކޮށް 10 އޮގަސްޓް 1972ގައި އެޑިއުކޭޝަން މިނިސްޓްރީގެ ވަކީލުކަމުގެ މަގާމަށް ބަދަލުކުރެއްވި އެވެ. އަދި 23 އޮކްޓޯބަރު 1976ގައި ޑިޕާޓްމަންޓް އޮފް އެޑިއުކޭޝަންގެ ނައިބުގެ މަގާމަށް ހަމަޖެއްސެވި އެވެ.

އެ މަގާމުގައި ހުންނަވައިގެން ޑރ. ޒާހިރު ވަނީ ކޮމިއުނިޓީ ސްކޫލްތައް ހެދުމާއި ޓީޗަރުން ތަމްރީނުކުރުމާއި ޓެކްސްޓް ފޮތްތައް ތައްޔާރުކުރުމަށް ޔުނެސްކޯއާއި ޔުނިސެފާއި ޔޫއެންޑީޕީ ގުޅިގެން ރާއްޖޭގައި ފެށި ކޮމިއުނިޓީ ތައުލީމު ތައާރަފުކުރުމުގެ މަޝްރޫއުގައި އެންމެ އިސްކޮށް ހަރަކާތްތެރިވެވަޑައިގެންފަ އެވެ.

ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި 23 ޖުލައި 1979 ގައި ޑރ. ޒާހިރު އެޑިއުކޭޝަން މިނިސްޓަރުގެ މަގާމަށް އައްޔަން ކުރެއްވި އެވެ. ޒާހިރުގެ މިނިސްޓަރުކަމުގެ ދަށުން ކޮންމެ އަތޮޅެއްގައި އަތޮޅު މަދަރުސާއެއް ހިންގަވަން ފެއްޓެވުމާއި ސައިންސް އެޑިއުކޭޝަން ސެންޓަރުގައި ނަމުގައި 1979 ވަނަ އަހަރު މާލޭގައި މަތީ ސާނަވީއަށް ކިޔަވައިދޭނެ ސްކޫލެއް ހުޅުވި އެވެ. އަދި އެ ސްކޫލުގައި އިސްލާމް މާއްދާ ކިޔަވައިދެއްވި ބޭފުޅުންގެ ތެރޭގައި ޒާހިރު ހިމެނިވަޑައިގެންނެވި އެވެ.

ޑރ. ޒާހިރުގެ މިނިސްޓަރުކަމުގައި ޒަމާނާ އެކަށޭނަ އަދި ދިވެހިވަންތަ ނިޒާމަކަށް ކިޔަވައިދެވޭނެ ގޮތަކަށް، ރާއްޖޭގެ ތައުލީމީ މުގައްރަރަށްވެސް އެކިފަހަރު މަތިން އިސްލާހީ ހެޔޮ ބަދަލުތަކެއް ގެނެސްދެއްވި އެވެ. އެގޮތުން ޑރ. ޒާހިރު އިސްވެ ހުންނަވައިގެން ހިންގެވި އެންމެބޮޑު އަނެއް މަޝްރޫއަކީ، އަސާސީ ތައުލީމުގެ މަޝްރޫއެވެ.

އެޑިއުކޭޝަން މިނިސްޓަރުގެ މަގާމު 10 އަހަރާއި 9 މަހަށްވުރެ ދިގު މުއްދަތެއްގައި ކުރެއްވުމަށްފަހު، ދެން އޭނާ އައްޔަންކުރެއްވީ، ރައީސް އޮފީހުގެ މިނިސްޓަރެއްގެ މަގާމަށެވެ. އެއަށްފަހު، ޔޫތު އެންޑް ސްޕޯޓްސް މިނިސްޓަރުގެ މަގާމާއި ޔޫތު ޑިވެލޮޕްމަންޓް އެންޑް ސްޕޯޓްސް މިނިސްޓަރުގެ މަގާމުވެސް ޑރ. ޒާހިރު ފުރުއްވި އެވެ.

ރާއްޖޭގެ ދުސްތޫރީ ނިޒާމު ހަރުދަނާ ކުރެއްވުމުގައި ރައްޔިތުންގެ މަޖިލީހުގައި ރައީސްގެ މެންބަރެއްގެ ހައިސިއްޔަތުންވެސް ޑރ. ޒާހިރު ވަނީ ހިދުމަތް ކުރައްވައިފަ އެވެ. އަދި ކީރިތި ގުރުއާން ދިވެހިބަހަށް ތަރުޖަމާކުރާ ކޮމިޓީގައިވެސް ދިގު މުއްދަތެއްގައި ހިދުމަތް ކުރެއްވި އެވެ. މީގެއިތުރުން ހުކުރު ހުތުބާ ލިޔުއްވުމާއި މާލޭގައި ހުކުރުނަމާދާއި އީދުނަމާދު އިމާމުވެ ކުރައްވައި އަދި ރައީސް އޮފީހުން ނެރުއްވި ”ދީނުގެ މަގު“ ނޫހަށް އެކި މައުޟޫއުތަކަށް މަޒުމޫނުތައްވެސް ޑރ. ޒާހިރު ލިޔުއްވި އެވެ.

ޑރ. ޒާހިރަށް ވަނީ 1989 ވަނަ އަހަރު، ނޫސްވެރިކަމުގެ ރޮނގުން އާންމު ހިދުމަތުގެ ޝަރަފުވެރިކަމުގެ އިނާމާއި 1990 ވަނަ އަހަރު، މިނިވަން 25ގެ އާންމު ހިދުމަތުގެ އިނާމު އަރުވައިފަ އެވެ. އަދި ނޫސްވެރިކަމުގެ ”އަލިމަސް ގަލަން“ ވެސް އޭނާއަށް ލިބިވަޑައިގެންފައިވެ އެވެ.

ޑރ. ޒާހިރު ޕީއެޗްޑީ ހާސިލުކުރެއްވީ، ތިއޯލޮޖީ އެންޑް ފިލޯސޮފީގެ ރޮނގުން، 2001 ވަނަ އަހަރު މެލޭޝިއާ އިންނެވެ. ޕީއެޗްޑީ ހާސިލުކުރެއްވުމާއި ގުޅިގެން، ސަރުކާރުން ދެއްވާ ހާއްސަ އިނާމު، އެ އަހަރު އޭނާއަށް ލިބިވަޑައިގެންނެވި އެވެ. ނިޝާން އިއްޒުއްދީންގެ އިއްޒަތުގެ ލަޤަބު، ޑރ. ޒާހިރަށް އެރުވީ 10 ނޮވެންބަރު 2008 ގައެވެ.

ޑރ. ޒާހިރަކީ ރާއްޖޭގެ ގައުމީ ޔުނިވާސިޓީގެ ޗާންސެލަރު ކަމުގެ މަގާމުވެސް ފުރުއްވައިފައިވާ ބޭފުޅެކެވެ. އަދި 20 އޮގަސްޓް 2019 އިން ފަށައިގެން އޭނާ ގެންދަވަނީ ރާއްޖޭގެ އިސްލާމީ ޔުނިވާސިޓީގެ ޗާންސެލަރު ކަމުގެ މަގާމު ފުރުއްވަމުންނެވެ.

ޑރ. ޒާހިރު، ދިވެހި ދައުލަތަށް ހިދުމަތް ކުރައްވަމުން ގެންދަވާތާ މިހާރު 48 އަހަރުވެފައިވާއިރު ތައުލީމީ ދާއިރާގައި އޭނާ ހިދުމަތް ކުރައްވަމުން ގެންދަވާތާ މިހާރު 32 އަހަރަށްވުރެ ގިނަ ދުވަސް ވެއްޖެ އެވެ.